छत्रपती संभाजीनगर :खेळताना कठडा नसलेल्या विहिरीत पडून दोन सख्ख्या भावंडांचा मृत्यू झाल्याची घटना आडूळ इथं घडली. आईसोबत विहिरीजवळ गेले असताना ही दुर्घटना घडली. जय कृष्णा फणसे (वय 10) आणि प्रणव कृष्णा फणसे (वय 6) असं मृत झालेल्या मुलांची नावं आहेत. गावकरी आणि अग्निशमन दलाच्या मदतीनं मृतदेह बाहेर काढण्यात आले. या दुर्घटनेनंतर परिसरात शोककळा पसरली आहे. दोन्ही मुलांचा मृत्यू झाल्यानं कुटुंबीयांनी घटनास्थळीच आक्रोश केला.
दोन भावंडांचा झाला मृत्यू :पैठण तालुक्यातील आडुळ इथं मंगळवारी शाळकरी सख्ख्या भावांचा विहिरीत पडून दुर्देवी मृत्यू झाल्याची घटना घडली. या घटनेमुळे गावात शोककळा पसरली आहे. जय कृष्णा फणसे आणि प्रणव कृष्णा फणसे अशी मृत मुलांची नावं आहेत. आडुळ येथील चौथीमध्ये शिकत असलेला जय फणसे आणि पहिलीमध्ये शिकत असलेला प्रणव फणसे हे 2 सख्खे भाऊ आपल्या आईसोबत जमवाडी परिसरातील रजापूर शिवारातील विहिरीवर गेले होते. यावेळी कठडे नसलेल्या विहिरीमध्ये दोघं पडून त्यांचा मृत्यू झाला. सुरक्षेच्या दृष्टिकोनातून विहिरीला कठडे नसल्यानं दुर्घटना घडली. त्यामुळे अशा विहिरींना सुरक्षीत करण्याची मागणी गावकऱ्यांनी केली आहे.
अग्निशमन दलानं बाहेर काढले मृतदेह :या घटनेची माहिती मिळताच पाचोड पोलीस ठाणे येथील पोलीस कर्मचाऱ्यांनी घटनास्थळी धाव घेतली. गावकऱ्यांच्या मदतीनं एका मुलाचा मृतदेह बाहेर काढला. मात्र दुसऱ्याचा मृतदेह सापडला नसल्यानं छत्रपती संभाजीनगर येथील अग्निशमन दलाला पाचारण करण्यात आलं. त्यानंतर जवानाच्या मदतीनं काही वेळात दुसरा मृतदेह पाण्याबाहेर काढला. आडुळ येथील शासकीय प्राथमिक आरोग्य केंद्रात वैद्यकीय अधिकारी एस डी नागरे यांनी दोन मृतदेहांचं शवविच्छेदन केलं. या दुर्देवी घटनेमुळे गावात शोककळा पसरली आहे. यासंदर्भात पाचोड पोलीस ठाण्यात नोंद करण्यात आली आहे. पुढील तपास सहायक पोलीस निरीक्षक शरदचंद्र रोडगे यांच्या मार्गदर्शनाखाली बीट जमादार दुल्लत करीत आहेत.
हेही वाचा :
- इंद्रायणी नदीत दोन विद्यार्थ्यांचा बुडून मृत्यू; एक मित्र बुडू लागला म्हणून इतर दोघे गेले अन्... - Indrayani Drown Death News
- शेततळ्यात बुडून तीन चिमुकल्या मुलींचा मृत्यू; संगमनेर तालुक्यातील घटना - Three Girls Died
- जळगाव जिल्ह्यातील तीन वैद्यकीय विद्यार्थ्यांचा रशियाच्या नदीत बुडून मृत्यू, एकाला वाचवण्यात यश - Indian Students Drown In Russian River
