अमरावती Educational Kit To Students : शासनाच्या वतीनं शाळेचा गणवेश मिळतो, अभ्यासक्रमाची सर्व पुस्तक देखील मिळतात. मात्र, वही, पेन, पेन्सिल असे वर्षभर लागणारे साहित्य मेळघाटच्या जंगलातील दुर्गम भागात वसलेल्या गावातील चिमुकल्यांना मिळणं फार कठीण आहे. या विद्यार्थ्यांना शालेय साहित्य नसल्यामुळं शिक्षणात कुठलीही अडचण येऊ नये यासाठी अकोला येथील सेवा बहुउद्देशीय संस्थेच्या वतीनं एकूण 14 शाळांमधील चिमुकल्यांना वर्षभर पुरेल असं शालेय साहित्य वितरित करण्यात आलय. सलग तीन दिवस हा उपक्रम राबविण्यात आला.
तीन वर्षांपासून केली जात आहे मदत : अकोला येथील सेवा बहुउद्देशीय संस्थेच्या वतीनं गत तीन वर्षांपासून मेळघाटातील दुर्गम भागात वसलेल्या एकूण पंधरा गावातील जिल्हा परिषदेच्या शाळेत शिकणाऱ्या विद्यार्थ्यांना शालेय साहित्य वितरित केलं जातं. चिखलदरा तालुक्यात येणाऱ्या सलोना सर्कल अंतर्गत सलोना, कोहना, भूलोरी, हत्तीघाट, मसुंडी ,बिहाली, जैतादेही, भादरी, बेला, लवादा, गटांग, जामली, ढोमणीफाटा आणि भवई या अतिशय दुर्गम भागात वसलेल्या गावातील शाळांपर्यंत पोहोचून तिथं शिकणाऱ्या आदिवासी चिमुकल्यांना शालेय साहित्याचं वितरण शुक्रवार ते रविवार असं सलग तीन दिवस करण्यात आलं.
1063 मुलांना लाभ : मेळघाटात अतिदुर्गम भागात वसलेल्या अनेक गावात साधं किराणा दुकान सापडणं देखील कठीण आहे. अशा ठिकाणी विद्यार्थ्यांना आवश्यक असणारे वही, पेन, चित्रकलेची वही आदी साहित्य उपलब्ध होणं कठीणच. आई वडील एखाद्या वेळेस परतवाडा, चिखलदरा किंवा धारणी या तालुक्याच्या ठिकाणी गेले तरच असं शालेय साहित्य चिमुकल्यांसाठी खरेदी करून आणू शकतात. असं जरी असलं तरी दुर्गम भागात असलेल्या अनेक गावातील ग्रामस्थ हे अनेकदा वर्षानुवर्ष तालुक्याच्या ठिकाणी देखील जात नाही अशी परिस्थिती आहे. एकूणच या आदिवासी भागातील विद्यार्थ्यांना शैक्षणिक साहित्य उपलब्ध व्हावं या उद्देशानं गत तीन वर्षांपासून आम्ही हा उपक्रम राबवित आहोत, अशी माहिती सेवा बहुउद्देशीय संस्थेचे अध्यक्ष वैभव वानखडे यांनी 'ईटीव्ही भारत' शी बोलताना दिली. यावर्षी मेळघाटात दुर्गम भागात वसलेल्या 14 गावांमधील एकूण 1063 चिमुकल्यांना आम्ही शालेय साहित्य वितरित केलं असल्याचंही वैभव वानखडे यांनी सांगितलं.