ठाणे Bhiwandi Accident : भरधाव वेगात जाणाऱ्या ट्रकनं दुचाकीला जोरदार धडक दिल्यानं झालेल्या अपघातात एका 13 वर्षीय शालेय विद्यार्थ्यांचा ट्रकखाली चिरडून जागीच तडफडून मृत्यू झाला असून त्याचा मित्र गंभीर जखमी झाल्याची घटना गुरुवारी दुपारच्या सुमारास भिवंडी तालुक्यातील खारबाव गावच्या हद्दीतील फिरींगपाडा इथं घडलीय. घटनेनंतर ट्रक चालक फरार झालाय. या अपघाताची नोंद भिवंडी तालुका पोलीस ठाण्यात करण्यात आली असून पोलीसांनी सीसीटीव्हीच्या आधारे फरार ट्रक चालकाचा शोध सुरु केलाय.
कसा घडला अपघात : मिळालेल्या माहितीनुसार, मृत अल्पवयीन मुलगा सातव्या इयत्तेत शिकत असून त्याचा मित्र दहाव्या इयत्तेत शिकत आहे. यातील दहाव्या इयत्तेत शिकत असलेल्या मुलाचं मुळ घर हा भिवंडी तालुक्यातील फिरिंग पाडा इथं असल्यानं तो मित्रासोबत आजी-आजोबांसाठी काही सामान घेऊन जात असताना सदर अपघात झाल्याची माहिती सूत्रांनी दिली आहे. पोलिसांनी दिलेल्या माहितीनुसार, (आज) गुरुवारी दुपारी 1 वाजेच्या सुमारास मयत आणि त्याचा मित्र हे दोघं खारबाव गावातून ॲक्टिव्हा दुचाकीवरुन फिरींगपाड्याच्या दिशेनं कामानिमित्त निघाले होते. त्यावेळी खारबावच्या दिशेनं भरधाव वेगानं जाणाऱ्या ट्रक चालकानं त्याच्या ताब्यातील ट्रक हयगयीनं व वाहतुकीच्या नियमांकडं दुर्लक्ष करुन दुचाकीला जोरात ठोकर दिली. या अपघातात दोघंही मित्र चिरडले गेले. त्यात सातव्या इयत्तेत शिकणाऱ्या मुलाचा मृत्यू झालाय.