नागपूर Leopard Cat Spotted In Pench Tiger Reserve : महाराष्ट्राच्या हद्दीतील पेंच व्याघ्र प्रकल्पात कॅमेरा ट्रॅपिंगमध्ये बिबट मांजर नरहर गावाजवळ आढळून आले. ज्या ठिकाणी कॅमेरा ट्रॅपद्वारे छायाचित्र घेण्यात आलं. ते ठिकाण एका हंगामी पाण्याचा प्रवाहाजवळ होतं. मध्य भारतामध्ये बिबट्या मांजर दिसण्याची ही पहिलीच घटना आहे. हे बिबट्या मांजर मानसिंग देव वन्यजीव अभयारण्याचा भाग असलेल्या बफर वनपरिक्षेत्र ‘नागलवाडी’ च्या नरहर बीटमधील कक्ष क्रमांक 663 मध्ये आढळले. हा परिसर ‘नरहर’ गावापासून केवळ दोन किलोमीटर अंतरावर आहे.
मध्य भारतात बिबट्या मांजराचं अस्तित्व नाही : भारतात मांजर कुळातील एकूण 15 प्रजाती आढळतात. भारतात असलेल्या एकूण मांजर कुळातील प्रजातींपैकी 10 लहान प्रजाती आहे. या लहान प्रजाती मुख्यत: उंदीरांच्या शिकारीमुळं महत्त्वपूर्ण पर्यावरणीय भूमिका बजावतात. बिबट्या मांजर (Scientific Name : Prionailurus bengalensis) भारतातील रान मांजरीनंतरची सर्वात सामान्य आणि व्यापक प्रजाती आहे. तिच्या अनुकूल लवचिकतेमुळं, ईशान्य भारत, उत्तर हिमालयीन राज्ये, ओरिसा, पश्चिम बंगाल आणि पश्चिम घाटाच्या काही भागात ती मर्यादित रितीनं आढळते. मात्र, मध्य भारतात बिबट्या मांजरचं अस्तित्व नाही.