पुणे Pune Hit and Run Case : पुण्यातील कल्याणीनगर परिसरातील अपघाताची घटना ताजी असतानाच आता पुन्हा एकदा पुण्यात हिट अँड रनचं प्रकरण समोर आलंय. एका अज्ञात वाहनानं दोन पोलीस कर्मचाऱ्यांना उडवल्याची घटना रविवारी मध्यरात्री घडली. यामध्ये एका पोलीस हवालदाराचा जागीच मृत्यू झाला असून दुसरा गंभीर जखमी झालाय. तर अपघातानंतर वाहनचालक वाहनासह फरार झालाय. दरम्यान, आरोपी वाहनचालकाचा शोध सुरू असल्याची माहिती पोलिसांनी दिलीय.
काय घडलं? :हा अपघात रविवारी मध्यरात्री हॅरिस ब्रीज बोपोडी जवळ रात्री पावणे दोन वाजण्याच्या सुमारास झाला. यासंदर्भात अप्पर पोलीस आयुक्त प्रवीण कुमार पाटील यांनी दिलेल्या माहितीनुसार, खडकी पोलीस ठाण्यात बीट मार्शल म्हणून काम करणारे पोलीस हवालदार समाधान कोळी आणि पोलीस कर्मचारी संजोग शिंदे रात्रीची गस्त घालण्यासाठी दुचाकीवरुन निघाले होते. तेव्हा समोरून वेगानं आलेल्या चारचाकी वाहनानं त्यांना धडक दिली. या अपघातात समाधान कोळी यांचा जागीच मृत्यू झाला. तर संजोग शिंदे यांच्यावर सध्या रुबी हॉल रुग्णालयात उपचार सुरू आहेत.