मुंबई Nitesh Rane Warrant :भाजपा आमदार नितेश राणे यांनी संजय राऊत यांच्याबाबत गेल्या वर्षी कथित बदनामीकारक विधान केलं होतं. त्या संदर्भात संजय राऊत यांनी माजगाव दंडाधिकारी न्यायालयामध्ये खटला दाखल केला होता. या खटल्याच्या सुनावणीस नितेश राणे उपस्थित न राहिल्यामुळे त्यांच्याविरुद्ध अजामीनपात्र वॉरंट जारी करण्यात आलंय. त्यामुळे आता पुढील सुनावणीस नितेश राणे हजर न राहिल्यास त्यांच्या अटकेची शक्यता आहे.
नितेश राणेंचं विधान काय होतं : संजय राऊत राष्ट्रवादी काँग्रेसमध्ये प्रवेश करणार असल्याचं विधान नितेश राणे यांनी केलं होतं. हे विधान म्हणजे माझी सार्वजनिक बदनामी असल्याचा आरोप करत संजय राऊतांनी न्यायालयात याचिका दाखल केली आहे. संजय राऊत यांच्या याचिकेनुसार, "महाराष्ट्राच्या राजकारणात आणखी एक भूकंप होणार आहे. उद्धव बाळासाहेब ठाकरे गटाचे खासदार संजय राऊत हे लवकरच राष्ट्रवादी काँग्रेसमध्ये प्रवेश करतील. राष्ट्रवादी काँग्रेसच्या वर्धापनदिनी किंवा 10 जून पूर्वीच संजय राऊत राष्ट्रवादीमध्ये प्रवेश करतील", असा सार्वजनिक दावा नितेश राणे यांनी केला.