दादर येथील चित्रा सिनेमागृहाच्या कॅन्टीनला आग, जीवितहानी नाही - Fire To Canteen Of Chitra Cinema

Fire To Canteen Of Chitra Cinema : मुंबईतील दादर परिसरात असलेल्या चित्रा सिनेमा हॉलला आज (28 जुलै) दुपारी आग लागली. परंतु, अग्निशमन दलाच्या जवानांनी अवघ्या दहा मिनिटांत आगीवर नियंत्रण मिळवलं. आगीत कोणतीही जीवितहानी झालेली नाही.

मुंबई Fire To Canteen Of Chitra Cinema:मुंबईतील दादर परिसरात आज (28 जुलै) दुपारी एका सिनेमा हॉलच्या कॅन्टीनला आग लागली असून या दुर्घटनेत कोणतीही जीवितहानी झाली नसल्याची माहिती पालिकेने दिली आहे. दादर येथील प्रसिद्ध सिंगल स्क्रीन चित्रा सिनेमाच्या कॅन्टीनमध्ये दुपारी 3.15 च्या सुमारास आग लागली. ही आग 'लेवल वन' या प्रकारातील असल्यानं अग्निशमन दलाच्या जवानांना अवघ्या दहा मिनिटांत आगीवर नियंत्रण मिळवण्यात यश आलं. सिंगल स्क्रीन चित्रा सिनेमा हॉल हा दादर परिसरातील एक प्रमुख सिनेमा हॉल आहे. इथे दररोज शेकडो लोक चित्रपट पाहण्यासाठी येतात.

जीवितहानी टळली :याबाबत मुंबई पालिकेने दिलेली अधिक माहिती अशी की, घटनेची माहिती मिळताच अग्निशमन विभागाचे अधिकारी आणि कर्मचारी तात्काळ घटनास्थळी दाखल झाले. यानंतर जवानांनी आगीवर नियंत्रण मिळवण्याच्या कामाला सुरुवात केली. या घटनेत आतापर्यंत कोणतीही जीवितहानी झाल्याचं वृत्त नाही. ही आग सिनेमा हॉलच्या कॅन्टीनमध्ये लागली असून केवळ इलेक्ट्रिक ओव्हन, खाद्यपदार्थ, विद्युत उपकरणे आणि वायरिंगपर्यंतच होती. पालिकेच्या माहितीनुसार, आग फक्त किचन पर्यंतच मर्यादित राहिल्यानं आगीवर तात्काळ नियंत्रण मिळवण्यात आलं.

सिनेमागृहाच्या सुरक्षा व्यवस्थेवरही प्रश्न :घटनेनंतर पालिकेच्या जी नॉर्थ वॉर्ड कर्मचाऱ्यांनी तातडीनं कारवाई करत परिसर सुरक्षित केला. अग्निशमन दलाचे जवान पाण्याच्या बंबासह घटनास्थळी दाखल झाले आणि सिनेमा पाहण्यासाठी आलेल्या प्रेक्षकांना तसेच कर्मचाऱ्यांना सुरक्षित बाहेर काढत परिसर रिकामा करण्यात आला. कोणत्याही आपात्कालीन परिस्थितीला सामोरं जावं लागण्याची शक्यता लक्षात घेत अग्निशमन विभागाचे अधिकारी परिस्थितीवर लक्ष ठेवून होते. या घटनेनंतर सिनेमागृहाच्या सुरक्षा व्यवस्थेवरही प्रश्न उपस्थित होत आहेत. दरम्यान, आगीच्या घटनेची सखोल चौकशी करून भविष्यात अशा घटना घडू नयेत यासाठी उपाययोजना करण्याचं आश्वासन पालिका प्रशासनानं दिलं आहे.

चित्रा सिनेमाचे निवेदन :

दादर येथील चित्रा सिनेमा हॉलमध्ये रविवारी दुपारी घडलेल्या घटनेने आम्ही अत्यंत दु:खी आहोत. आम्ही समजतो की या घटनेमुळे आमच्या ग्राहकांना आणि कर्मचाऱ्यांना चिंता आणि गैरसोय झाली असावी. सर्वप्रथम, या घटनेत कोणीही जखमी झाले नसल्याची बीएमसीने पुष्टी केल्याबद्दल आम्ही आभारी आहोत. कॅन्टीन परिसरात लागलेली आग त्वरीत आटोक्यात आणण्यात आली आणि मुंबई अग्निशमन दलाने तातडीने कार्यवाही केल्याबद्दल आम्ही त्यांचे आभारी आहोत.

आमचे सर्वोच्च प्राधान्य आमचे ग्राहक आणि कर्मचारी यांची सुरक्षा आणि कल्याण हे नेहमीच राहिले आहे. सर्वांना सुरक्षितपणे बाहेर काढणाऱ्या आमच्या टीम आणि मुंबई अग्निशमन दलाच्या प्रयत्नांचे आम्ही कौतुक करतो. आमच्या आवारात सर्व सुरक्षा मानकांची पूर्तता केली जाते याची खात्री करण्यासाठी आमची टीम संबंधित अधिकाऱ्यांच्या सहकार्याने तपशीलवार तपासणी करत आहे. या घटनेतून आपण धडा घेऊ आणि भविष्यात अशा घटना टाळण्यासाठी आवश्यक ती सर्व पावले उचलू.

आम्ही आमच्या ग्राहकांना खात्री देऊ इच्छितो की आमच्या सुरक्षा प्रणाली आधीच मजबूत आहेत आणि आम्ही त्यांना आणखी मजबूत करण्यासाठी वचनबद्ध आहोत. आम्ही आमचे सिनेमा शक्य तितक्या लवकर पुन्हा सुरू करण्याचे काम करत आहोत आणि त्यादरम्यान तुम्हाला याची माहिती देत ​​राहू. तुमच्या समर्थनासाठी आणि समजून घेतल्याबद्दल आम्ही कृतज्ञ आहोत. तुम्हाला आमचा सिनेमा आवडतो हे आम्हाला माहीत आहे आणि आम्ही लवकरच तुमच्या स्वागतासाठी उत्सुक आहोत.

हेही वाचा: