मुंबई Heavy Security On Gateway Of India :रविवारची सुटी असल्यानं मुंबईतील गेट वे परिसरात फिरायला येणाऱ्या पर्यटकांची संख्या मोठ्या असते. मात्र तुम्हीही आज मुंबईतील गेट वे ऑफ इंडिया परिसरात फिरायला जाण्याचा बेत करत असला, तर ही बातमी खास तुमच्यासाठी आहे. आज मुंबईतील गेट वे ऑफ इंडिया परिसरात महाविकास आघाडीनं सरकार विरोधात आंदोलन करण्याचा निर्णय घेतला आहे. मालवण इथं छत्रपती शिवाजी महाराज यांचा पुतळा कोसळल्याप्रकरणी आज हे आंदोलन करण्यात येत आहे. त्यामुळे गेट वे ऑफ परिसर पर्यटकांसाठी आज बंद ठेवण्यात आला आहे. त्यामुळे पर्यटकांचा मोठा हिरमोड होण्याची शक्यता आहे.
गेट वे ऑफ इंडिया परिसरात आंदोलन :महाविकास आघाडीच्या वतीनं आज मुंबईतील गेट वे ऑफ इंडिया परिसरात आंदोलन करण्यात येत आहे. आंदोलनकांनी मोठ्या प्रमाणात गेट वे ऑफ इंडिया परिसरात गर्दी केली. त्यामुळे महाविकास आघाडीचं आंदोलन लक्षात घेता पुढील आदेशापर्यंत सकाळी 10 वाजतापासून गेटवे ऑफ इंडिया परिसर पर्यटकांसाठी बंद ठेवण्यात आला आहे. महाविकास आघाडीचे नेते गेट वे ऑफ इंडिया इथल्या छत्रपती शिवाजी महाराज यांच्या पुतळ्यासमोर आंदोलन करणार आहेत. आंदोलनाच्या पार्श्वभूमीवर गेटवे ऑफ इंडिया परिसरात मोठ्या प्रमाणात पोलीस बंदोबस्त तैनात करण्यात आला आहे.