मुंबई Dhairyashil Mane Appointed : सध्या दिल्लीत पावसाळी अधिवेशन सुरु आहे. राज्यातील खासदार सभागृहात आपापल्या मतदारसंघातील समस्या, प्रश्न मांडताना दिसत आहेत. मात्र शिवसेना पक्षाकडून एक मोठी आणि महत्त्वाची बातमी समोर येत आहे. लोकसभेत शिवसेना संसदीय पक्षाच्या उपनेतेपदी हातकणंगले लोकसभा मतदारसंघातील खासदार धैर्यशील माने यांची सर्वानुमते निवड करण्यात आली आहे. शिवसेनेच्या संसदीय पक्षाच्या उपनेतेपदी निवड झाल्यानं धैर्यशील माने यांच्या समर्थकांनी मोठा जल्लोष केला आहे.
युवा खासदारांवर पक्षाकडून मोठी जबाबदारी :धैर्यशील माने हातकणंगले लोकसभा मतदारसंघाचे खासदार आहेत. या मतदारसंघातून सलग दुसऱ्यांदा धैर्यशील मानेंना मतदारांनी खासदार म्हणून निवडून दिलं आहे. खासदार धैर्यशील माने यांच्या नियुक्तीचं पत्र शिवसेना शिंदे गटाचे प्रमुख एकनाथ शिंदे यांनी लोकसभा अध्यक्षांकडं सादर केलं. दरम्यान, शिवसेना पक्षानं धैर्यशील माने यांची उपनेतेपदी निवड करुन एका युवा खासदारावर लोकसभेची जबाबदारी सोपवली आहे. अभ्यासू, तरुण आणि तडफदार खासदार अशी धैर्यशील माने यांची राजकारणात ओळख आहे.