छत्रपती संभाजीनगर Eknath Shinde On Uddhav Thackeray :"काही लोक ठाण्याला येऊन गेले, बरंच काही बोलले. पण आम्ही त्यांच्याकडं लक्ष देत नाही. काही दिवसांपूर्वी दिल्लीत लोटांगण घालायला जातात, असा आरोप आमच्यावर करणारे, आज दिल्लीत जाऊन बसत आहेत. ताल कटोरा स्टेडियममध्ये ते कशाला गेले हे सर्वांना माहिती आहे," असा हल्लाबोल मुख्यमंत्री एकनाथ शिंदे यांनी केला. "आमचं काम करणारं सरकार आहे, घरी बसून ऑनलाईन काम करणारं नाही. फेस टू फेस काम करतो, शेतावर, बांधावर जाऊन सगळ्यांशी बोलून काम करतो. लाडकी बहीण असेल किंवा अन्य योजना, त्यांना चांगला प्रतिसाद मिळत असल्यानं विरोधकांच्या पोटात दुखत आहे. मात्र त्यांच्यासाठी दिवंगत बाळासाहेब ठाकरे आपला दवाखाना आहे, तिथं मोफत उपचार मिळतील," अशी खोचक टीका एकनाथ शिंदे यांनी केली.
व्होट बँक म्हणून बघणाऱ्यांना धडा शिकवा :"बाबासाहेब आंबेडकरांचं जीवन सर्वांसाठीच प्रेरणादायी आहे. वंचित घटकांसाठी त्यांनी केलेलं कार्य हे सर्वांसाठीच प्रेरणादायी आणि योग्य दिशा दाखवणारं आहे. मात्र काही लोक फक्त वोट बँक म्हणून पाहतात, त्यांना धडा शिकवणार आहात का नाही?" असा प्रश्न एकनाथ शिंदे यांनी जाहीर कार्यक्रमात केला. आंबेडकरी संघटनांतर्फे टिव्ही सेंटर मैदानात कृतज्ञता सोहळा घेण्यात आला. त्यावेळी "डॉ बाबासाहेब आंबेडकर यांनी तयार केलेलं संविधान बदलणं शक्य नाही," असा विश्वास एकनाथ शिंदे यांनी दिला. बाबासाहेब आंबेडकरांना दोन वेळेस पराभूत करण्याचं काम कोणी केलं तर तो काँग्रेस पक्ष होता. मात्र 2015 मध्ये पहिल्यांदा संविधान दिन पंतप्रधान नरेंद्र मोदी यांनी साजरा केला. सार्वभौम राज्य म्हणून डॉ. बाबासाहेबांमुळेच देशाला ओळख मिळाली. त्यांचं योगदान आम्हाला नाकारता येणार नाही. त्यांचे उपकार हे कधीच विसरणं शक्य नाही. "सबका अभिमान, सबके दिल मे संविधान," असं मुख्यमंत्री एकनाथ शिंदे यांनी यावेळी सांगितलं. "महापुरुष कोणत्या एका जाती किंवा समाजाचे नसतात, ते सर्वांचे असतात. त्यामुळेच त्यांचा आदर्श समोर ठेवून आम्ही सरकार चालवत आहोत," असं त्यांनी सांगितलं.