वडिलांच्या मृत्यूचं राजकारण करू नका; झिशान सिद्दीकींनी व्यक्त केली भावना

राष्ट्रवादीचे नेते बाबा सिद्दीकी यांच्या हत्येनंतर पहिल्यांदाच त्यांचा मुलगा आमदार झिशान सिद्दीकी यांनी एका पोस्टद्वारे भावना व्यक्त केल्या आहेत.

मुंबई : राष्ट्रवादीचे नेते तथा माजी राज्यमंत्री बाबा सिद्दीकी यांची १२ ऑक्टोबर रोजी मुंबईत हत्या करण्यात आली. निर्मल नगर येथील झिशान सिद्दीकी यांच्या कार्यालयाबाहेर त्यांच्यावर गोळीबार करण्यात आला. या हल्ल्याची जबाबदारी बिश्नोई टोळीनं घेतली असल्याची चर्चा आहे. या हत्या प्रकरणाचा पोलीस कसून तपास करत असून, त्यांनी या हल्ल्यातील काही संशयित आरोपींना विविध ठिकाणांहून अटक केली. अशातच वडिलांच्या हत्येनंतर त्यांचे पुत्र व वांद्रे पश्चिम मतदारसंघाचे आमदार झिशान सिद्दीकी यांनी पहिल्यांदाच समाजमाध्यमांवर एक पोस्ट केली आहे. या पोस्टद्वारे त्यांनी त्यांच्या भावना व्यक्त केल्या आहेत.

मृत्यूचं राजकारण करू नका : झिशान सिद्दीकी यांनी 'एक्स' प्लॅटफॉर्मवर एक पोस्ट शेयर केली. या पोस्टमध्ये त्यांनी म्हटलं आहे की, “माझ्या वडिलांनी गरीब निष्पाप लोकांचं जीवन सुधारण्याचा प्रयत्न केला. त्यांच्या घरांचं व त्यांचं संरक्षण करताना आपला जीव गमावला. माझं कुटुंब आज मोडून पडलंय. परंतु, माझ्या वडिलांच्या मृत्यूचं राजकारण केलं जाऊ नये आणि त्यांचा संघर्ष व्यर्थ जाऊ नये असं मला वाटतं. मला न्याय हवा आहे, माझ्या कुटुंबाला न्याय हवा आहे."

जबाब नोंदवला : झिशान सिद्दीकी यांनी त्यांच्या पोस्टमध्ये अभिनेता सलमान खान व या हत्येची कथितरित्या जबाबदारी स्वीकारलेल्या लॉरेन्स बिश्नोई टोळीचं नाव घेतलं नाही. झिशान यांनी बुधवारी व गुरुवारी पोलीस आयुक्तालयात हजर राहून या प्रकरणी पोलिसांना जबाब दिल्याची माहिती अधिकाऱ्यांनी दिली.

पोलीस तपास सुरू : बाबा सिद्दीकी यांच्या हत्येचा तपास पोलीस वेगानं करत आहेत. या प्रकरणी हल्लेखोरांसह अन्य काही आरोपी पोलिसांनी विविध राज्यातून अटक केले आहेत. हत्येचा कट पुण्यात रचल्याची माहिती मुंबई पोलिसांच्या तपासात समोर आली होती. तसंच हत्येची जबाबदारी ही बिश्नोई गँगन घेतल्याची माहिती एका कथित पोस्टद्वारे समोर आली होती. मात्र, यााबाबत तपास सुरू असल्याची माहिती पोलिसांनी दिली होती.

हेही वाचा -