बारामतीत आज धुमशान; अजित पवार आणि युगेंद्र पवार भरणार उमेदवारी अर्ज, शक्तिप्रदर्शनात कोण ठरणार वरचढ ?

बारामती मतदार संघात काका विरुद्ध पुतण्या अशी लढत रंगणार आहे. आज उपमुख्यमंत्री अजित पवार आणि त्यांचे पुतणे युगेंद्र पवार आपला उमेदवारी अर्ज सादर करणार आहेत.

पुणे :राज्याचं नव्हे तर देशाचं लक्ष लागलेल्या बारामती विधानसभा मतदार संघात आज उपमुख्यमंत्री अजित पवार मोठं शक्ती प्रदर्शन करत उमेदवारी अर्ज भरणार आहेत. तर दुसरीकडं शरद पवार यांच्या उपस्थितीत युगेंद्र पवार हे देखील आज आपला उमेदवारी अर्ज भरणार आहेत. यामुळे बारामतीत पुन्हा एकदा काका-पुतण्या यांच्या लढाईत कोण बाजी मारणार हे पाहावं लागणार आहे. मात्र आज बारामती मतदार संघात मोठं 'धुमशान' पाहायला मिळणार आहे.

बारामतीत पवार विरुद्ध पवार होणार लढत :बारामती विधानसभा निवडणुकीत राष्ट्रवादी शरदचंद्र पवार पक्षाकडून युगेंद्र पवार यांना उमेदवारी जाहीर झाली आहे. तर दुसरीकडं राष्ट्रवादी काँग्रेस पक्षाचे अजित पवार हेच उमेदवार असल्यानं बारामतीत पवार विरुद्ध पवार अशी लढत होणार आहे. लोकसभेत झालेल्या निवडणुकीत बारामतीच्या जनतेनं शरद पवारांना साथ दिली होती. आता बारामतीकर अजित पवार यांना साथ देणार की शरद पवार यांना साथ देणार हे पाहावं लागणार आहे.

बारामतीत पुन्हा काका पुतणे समोरासमोर :राष्ट्रवादी फुटीनंतर पवार कुटुंबात देखील फूट पडली आहे. त्यामुळे लोकसभा निवडणूक 2024 मध्ये बारामतीची जनता शरद पवार यांच्यासोबत असल्याचं दिसून आलं. तर दुसरीकडं अजित पवार यांच्यासोबत त्यांचं कुटुंब असल्याचं पाहायला मिळालं. गेल्या काही दिवसांपूर्वी तर अजित पवार हे बारामतीतून निवडणूक लढणार नसल्याची जोरदार चर्चा होती. पण आता अजित पवार यांना उमेदवारी जाहीर झाली आहे. त्यामुळे बारामतीत पुन्हा काका पुतणे समोरासमोर आले असून यात कोण बाजी मारणार हे पाहावं लागणार आहे.

हेही वाचा :