अफगाणिस्तान वाणिज्य दूतावास नेतृत्वाविना निर्णायकी अवस्था, तालिबानचा चंचूप्रवेश होण्याची शक्यता - Afghanistan Consulate

Afghanistan Consulate in Mumbai : अफगाणिस्तानच्या वाणिज्यदूत जाकिया वार्दक यांच्या राजीनाम्यामुळं मुंबईतील अफगाणिस्तानचे वाणिज्यदूत कार्यालय किंबहुना भारतातील अफगाणिस्तानच्या एकूणच कार्यालयांवर प्रतिकूल परिणाम झालाय.

मुंबई Afghanistan Consulate in Mumbai : अफगाणिस्तानच्या वाणिज्यदूत जाकिया वार्दक यांनी गेल्या आठवड्यात राजीनामा दिल्यानं मुंबईतील अफगाणिस्तानचे वाणिज्यदूत कार्यालय नेतृत्वाविना निर्णायकी अवस्थेत पोहोचलंय. जाकिया यांनी राजीनामा दिल्यापासून त्या अज्ञातवासात आहेत. त्यांच्याशी संपर्क साधणं अशक्य झालंय. त्यांच्याकडं अमेरिकेचं नागरिकत्व असल्यानं त्या देशाबाहेर निघून अमेरिकेला गेल्याची शक्यता वर्तवली जात आहे. मात्र त्यांच्या राजीनाम्यामुळं मुंबईतील अफगाणिस्तानचे वाणिज्यदूत कार्यालय किंबहुना भारतातील अफगाणिस्तानच्या एकूणच कार्यालयांवर प्रतिकूल परिणाम झालाय.

तालिबानचा भारतात कॉन्सुलेट प्रवेश करण्याचा प्रयत्न : अफगाणिस्तानवर तालिबाननं ताबा मिळवला असला तरीही भारतात अद्याप तालिबानच्या वाणिज्यदूत कार्यालयाला व अधिकाऱ्यांना भारतीय परराष्ट्र खात्याकडून परवानगी मिळालेली नाही. त्यामुळं अजूनही भारतात अफगाणिस्तानचीच वाणिज्यदूत कार्यालये कार्यरत आहेत. मात्र सध्या मुंबईतील अफगाणिस्तान वाणिज्यदूत पदाची जबाबदारी सांभाळत असलेल्या जाकिया वार्दक या राजीनाम्यामुळं पदावरुन पायउतार झाल्यानं बदललेल्या परिस्थितीचा लाभ घेण्याचा प्रयत्न तालिबान सरकारकडून केला जात असल्याच्या घडामोडी समोर येऊ लागल्या आहेत. तालिबान आता अफगाणिस्तानऐवजी आपली वाणिज्यदूत कार्यालये व राजदूत कार्यालये सुरु करण्यासाठी युध्दपातळीवर प्रयत्न करत असल्याचं समोर येतंय, अशी माहिती सुत्रांनी दिली. मात्र अधिकृतरित्या बोलण्यास त्यांनी नकार दिला. भारतातील लोकसभा निवडणुकीच्या निकालानंतर याबाबत निर्णय घेतला जाण्याची शक्यता वर्तवली जातेय.

नवी दिल्लीतील कार्यालय कायमस्वरुपी बंद : वार्दक यांच्या राजीनाम्यानंतर आता हैद्राबाद येथील अफगाणिस्तान कॉन्सुलेटची जबाबदारी सांभाळत असलेले प्रभारी वाणिज्यदूत सय्यद मोहम्मद इब्राहिमखिल हे देशातील एकमेव वाणिज्यदूत म्हणून कार्यरत आहेत. नवी दिल्लीतील अफगाणिस्तानचे राजदूत कार्यालय नोव्हेंबर 2023 मध्ये कायमस्वरुपी बंद करण्यात आले होते. केवळ मुंबई व हैद्राबाद येथील वाणिज्यदूत कार्यालयं कार्यरत होती. जाकिया वार्दक या अफगाणिस्तानच्या मुंबईतील पहिल्या महिला वाणिज्यदूत होत्या. अफगाणिस्तानचे तत्कालिन राष्ट्रपती अश्रफ घनी यांच्या कार्यकाळात त्यांची मुंबईत नियुक्ती करण्यात आली होती. 2020 मध्ये जाकिया यांची नियुक्ती करण्यात आली होती. पुढं घनी यांचं सरकार पदच्यूत करुन तालिबाननं अफगाणिस्तानवर ताबा मिळवला.

पहिल्याच वाणिज्य राजदूत : मुंबई विमानतळावरील तपासणीमध्ये तब्बल 25 किलो सोनं लपवून आणलं जात असल्याचं समोर आल्यानंतर अफगाणिस्तानच्या मुंबईतील पहिल्या महिला वाणिज्यदूत जाकिया वार्दक यांना नामुष्कीजनक पध्दतीनं राजीनामा द्यावा लागला होता. सोने तस्करीच्या आरोपावरुन राजीनामा देण्याची वेळ आलेल्या त्या कदाचित पहिल्याच वाणिज्यदूत असाव्यात.

हेही वाचा :