जळगाव हादरलं! 12 वर्षीय मुलीवर अत्याचार करुन डोकं दगडानं ठेचलं; 'नराधमाला फाशी द्या' संतप्त जमावाची मागणी - Minor Girl Rape Murder Case

Minor Girl Rape Murder Case : महाराष्ट्रात महिला अत्याचाराच्या घटनांमध्ये सातत्यानं वाढ होत असल्याचं दिसतंय. त्यातच आता जळगाव जिल्ह्यातील चोपडामधून संतापजनक प्रकार समोर आलाय. विरवाडे-मालापूर रस्त्यावर एका 12 वर्षांच्या मुलीवर अत्याचार करुन तिची दगडानं ठेचून हत्या करण्यात आली आहे.

जळगाव Minor Girl Rape Murder Case : राज्यात महिला आणि मुलींवरील अत्याचाराच्या घटना काही कमी होताना दिसत नाहीत. बदलापूरच्या घटनेमुळं संपूर्ण देश हादरलेला असताना राज्यातील विविध भागांमधून महिला अत्याचाराच्या घटना समोर येत आहेत. त्यातच आता जळगाव जिल्ह्यातील चोपडा तालुक्यातही अशीच घटना घडल्याचं समोर आलंय. नराधमानं एका 12 वर्षीय चिमुकलीवर अत्याचार केला. त्यानंतर त्यानं मुलीला दगडानं ठेचून तिची हत्या केली. या घटनेमुळं चोपडा तालुक्यात संतापाची लाट उसळली आहे. नराधमाला फाशी देण्यात यावी, अशी मागणी संतप्त जमावाकडून केली जात आहे.

अत्याचार करुन केली हत्या :7 सप्टेंबरला सायंकाळी 5 वाजेच्या सुमारास शेतातील निंदणाचं काम आटोपून पीडिता आपल्या लहान बहिणीसह रस्त्यानं आपल्या गावाकडं निघाली होती. या दरम्यान आरोपीनं तिला एका शेतात ओढूत नेत तिच्यावर अत्याचार केला. त्यानंतर दगडानं ठेचून तिची हत्या केली. पीडितेच्या बहिणीनं गावकऱ्यांना घटनेसंदर्भात माहिती दिली. गावकऱ्यांनी मुलीचा शोध घेतला असता, एका शेतामध्ये तिचा मृतदेह आढळून आला. त्यानंतर गावकऱ्यांनी पोलिसांना माहिती दिली.

आरोपीवर गुन्हा दाखल : घटनेची माहिती मिळताच फॉरेन्सिक टीमसह चोपडा परिक्षेत्राचे उपविभागीय पोलीस अधिकारी आणि अन्य अधिकारी घटनास्थळी दाखल झाले. पोलिसांनी तातडीनं या प्रकरणाचा तपास करण्यासाठी चार पथकं तयार केली. त्यानंतर चोपडा-आडगाव रस्त्यावर आरोपी पळून जात असताना पोलिसांच्या हाती लागला. त्याच्यावर पोक्सो कायद्यासह विविध कलमांतर्गत गुन्हा दाखल करण्यात आल्याची माहिती पोलीस निरीक्षक साळवे यांनी दिलीय.


'नराधमाला फाशी द्या' : घटनेच्या निषेधार्थ रविवारी (8 सप्टेंबर) चोपडा इथं मूक मोर्चा काढण्यात आला. त्यानंतर संतप्त नागरिकांनी बऱ्हाणपूर अंकलेश्वर रस्त्यावर रास्ता रोको आंदोलन करत 'नराधमाला फाशी द्या' अशी मागणी केली. यावेळी आरोपीवर कठोर कारवाई केली जाईल, असं आश्वासन पोलीस अधिकारी आणि कर्मचाऱ्यांनी आंदोलनकर्त्यांना दिलं.

हेही वाचा -