अनंतपूर Ishan Kishan century : भारताचा युवा यष्टिरक्षक फलंदाज इशान किशननं पुन्हा एकदा आपल्या फलंदाजीची ताकद दाखवून दिली आहे. या डावखुऱ्या फलंदाजानं दुलीप ट्रॉफीमध्ये आक्रमक शतक झळकावलं आहे. इंडिया सी कडून खेळत असलेल्या इशान किशननं शानदार फलंदाजी करताना इंडिया बी विरुद्ध शतक झळकावलं. मोठी गोष्ट म्हणजे इंडिया सी संघानं आपला कर्णधार ऋतुराज गायकवाड दुखापतीमुळं गमावला होता, सामन्याच्या दुसऱ्या चेंडूवर तो रिटायर्ड हर्ट झाला होता. मात्र यानंतर इशान किशननं त्याच्या स्टाईलमध्ये आपलं शतक पूर्ण केलं. इशान किशननं जवळपास 90 च्या स्ट्राईक रेटनं हे शतक केलं. हे त्याचं प्रथम श्रेणी क्रिकेटमधील 7 वं शतक आहे. इशान किशनचं हे शतकही खास आहे, कारण त्यानं 2 वर्षांनंतर प्रथम श्रेणी क्रिकेटमध्ये शतक केलं आहे.
पहिल्या सामन्यात खेळू शकला नव्हता इशान : इशान किशन पहिल्या सामन्यात खेळू शकला नाही. या खेळाडूला दुखापत झाल्यानं तो पहिल्या सामन्यातून बाहेर राहिला. पण फिट होताच इशान किशननं आपली प्रतिभा दाखवून दिली. ईशाननं इंडिया बी च्या गोलंदाजांची जोरदार धुलाई केली. विशेषत: फिरकीपटू त्याचं लक्ष्य होतं. त्यानं वॉशिंग्टन सुंदरविरुद्ध शानदार फटके मारले तसंच संधी मिळताच एकही कमकुवत चेंडू सोडला नाही. इशान किशननं या सामन्यात 111 धावांची खेळी केली.