कोल्हापूर Paris Olympics 2024 : पॅरिस ऑलिम्पिक 2024 स्पर्धेत भारताचा स्टार नेमबाज स्वप्नील कुसाळेनं अंतिम फेरीत आपलं स्थान पक्क केलं आहे. स्वप्निलनं जिद्द, चिकाटी आणि सातत्याच्या बळावर त्याचा आतापर्यंतचा प्रवास केला आहे. गुरुवारी होणाऱ्या अंतिम सामन्यात देशवासीयांच्या पाठिंब्यावर आणि विठ्ठलाच्या आशीर्वादानं तो नक्कीच सुवर्णपदकाला गवसणी घालेल, असा विश्वास स्वप्नीलचे वडील सुरेश कुसाळे यांनी व्यक्त केला.
मागील ऑलिम्पिक हुकली होती संधी : पॅरिस इथं सुरु असलेल्या ऑलिम्पिक 2024 स्पर्धेत कोल्हापुरचा नेमबाज स्वप्नील सुरेश कुसाळं यानं कमाल करत नेमबाजीत अंतिम फेरी गाठली. बुधवारी 31 जुलै रोजी झालेल्या पात्रता स्पर्धेत स्वप्नील कुसाळेनं सातव्या स्थानावर राहून 50 मीटर एअर रायफल 3 पोझिशन इव्हेंटमध्ये 590 गुण मिळवत अंतिम फेरीत आपलं स्थान निश्चित केलं. स्वप्निल कुसाळे हा मूळचा राधानगरी तालुक्यातील कांबळवाडी येथील आहे. त्यानं यापूर्वी राष्ट्रीय, आंतरराष्ट्रीय स्तरावरील स्पर्धेमध्ये पदकं मिळवली आहेत. टोकियो इथं 2020 मध्ये झालेल्या ऑलिम्पिक स्पर्धेत त्याची संधी पात्रता फेरीत हुकली होती. यंदा मात्र त्यानं अंतिम फेरीत पोहोचत देशवासीयांच्या अपेक्षा उंचावल्या आहेत. विशेष म्हणजे स्वप्निल हा भारतीय रेल्वे मध्ये टीसी म्हणूनही कार्यरत आहे. त्यानं पुण्यातील बालेवाडी इथं आपल्या नेमबाजीचा सराव केला.