बूम..बूम..बूमराह…! पाकिस्तान विरुद्धच्या सामन्यात रचला 'हा' मोठा विक्रम - IND Vs Pak

T20 World Cup 2024 : सर्वात अनुभवी वेगवान गोलंदाज जसप्रीत बुमराहनं आपल्या नावावर आणखी एक मोठा रेकॉर्ड केलाय. टी-20 आंतरराष्ट्रीय क्रिकेटमध्ये भारतीय संघासाठी सर्वाधिक बळी घेणारा बुमराह हा तिसरा गोलंदाज ठरलाय.

Jasprit BumrahRecord :टी-20 विश्वचषक 2024 चा 19 वा सामना भारत आणि पाकिस्तान यांच्यात न्यूयॉर्कमधील नासाऊ काउंटी आंतरराष्ट्रीय क्रिकेट स्टेडियमवर खेळण्यात आला. भारत-पाकिस्तानमधील हा सामना खूपच उत्कंठावर्धक होता. या सामन्यात पाकिस्तानसमोर विजयासाठी 120 धावांचं लक्ष्य होतं. मात्र पाकिस्तानला सात गडी गमावून केवळ 113 धावाच करता आल्या. टी-20 विश्वचषकाच्या इतिहासात भारताचा पाकिस्तानविरुद्धच्या आठ सामन्यांमधला हा सातवा विजय ठरलाय. टीम इंडियाला हा सामना जिंकून देण्यात टीमचा सर्वात अनुभवी वेगवान गोलंदाज जसप्रीत बुमराहनं महत्त्वाची भूमिका बजावली. या सामन्यात त्यानं टीम इंडियासाठी दमदार कामगिरी केली. त्यामुळं जसप्रीत बुमराहला पाकिस्तानविरुद्धच्या सामन्यात सामनावीराचा पुरस्कार देण्यात आला.

जसप्रीत बुमराहने इतिहास रचला :या सामन्यात एकूण 3 विकेट घेत जसप्रीत बुमराह टी-20 आंतरराष्ट्रीय क्रिकेटमध्ये भारतीय संघासाठी सर्वाधिक बळी घेणारा तिसरा गोलंदाज ठरला आहे. त्यानं अनुभवी अष्टपैलू खेळाडू हार्दिक पांड्याला मागे टाकलं आहे. युजवेंद्र चहल हा भारताकडून सर्वाधिक टी-20 आंतरराष्ट्रीय बळी घेणारा गोलंदाज आहे. चहलनं 80 टी-20 सामन्यांच्या 79 डावांमध्ये गोलंदाजी करताना एकूण 96 विकेट घेतल्या आहेत. त्यानंतर भुवनेश्वर कुमारचं नाव दुसऱ्या क्रमांकावर येतं. भुवनेश्वर कुमारनं 87 सामन्यांच्या 86 डावात 90 विकेट घेतल्या आहेत. त्याचबरोबर आता जसप्रीत बुमराह तिसऱ्या क्रमांकावर आला आहे. बुमराहने आतापर्यंत 64 सामन्यांच्या 63 डावांमध्ये 79 बळी घेतले आहेत.

जसप्रीत बुमराहची प्रतिक्रिया : भारताला 6 धावांनी रोमांचक विजय मिळवून दिल्यावर जसप्रीत बुमराह म्हणाला, "खरंच छान वाटतंय. आम्हाला वाटलं की, आम्ही थोडे कमजोर पडलो. आम्ही फलंदाजीत कमी धावा केल्या होत्या. पण आमची गोलंदाजी चांगली झाली. या सामन्यात आम्ही शक्य तेवढं चांगल करण्याचा प्रयत्न केला. सर्व काही चांगलं झालं म्हणून मला आनंद झालाय. अमेरिकेतील क्रिकेट समर्थकांकडून टीम इंडियाला मिळत असलेल्या पाठिंब्याबद्दल बोलताना तो म्हणाला, ''आम्ही भारतात खेळत आहोत असं आम्हाला वाटतं होतं. समर्थकांकडून एवढा पाठिंबा मिळाल्यानं खरोखर आनंद झालाय. समर्थकांमुळे आम्हाला मैदानावर ऊर्जा मिळते.”

ऋषभ पंतची उत्कृष्ट फलंदाजी : सामन्यात भारतानं नाणेफेक गमावून प्रथम फलंदाजी करताना केवळ 119 धावा केल्या. टीम इंडियाकडून ऋषभ पंतनं सर्वाधिक धावा केल्या. भारताचे फलंदाज एकेक करून पॅव्हेलियनमध्ये परतत असताना पंत योद्ध्यासारखा मैदानात उभा राहिला. ऋषभ पंतनं 31 चेंडूत 6 चौकार मारत शानदार 42 धावा केल्या. संघाच्या धावसंख्येमध्ये त्याचा मोठा वाटा होता. पंतने विकेटकीपिंगमध्येही उत्कृष्ट कामगिरी केली. त्याने अनेक उत्कृष्ट झेल घेतले. अक्षर पटेलनं 20 धावांचं योगदान दिलं. रोहित शर्मा 13 धावा करून पॅव्हेलियनमध्ये परतला. तर पाकिस्तानकडून नसीम शाह आणि हरिस रौफ यांनी 3-3 बळी घेतले. दुसरीकडे मोहम्मद आमिरनं 2 विकेट घेतल्या.

120 धावांच्या लक्ष्याला प्रत्युत्तर देताना पाकिस्तानचा संघ 113 धावा करू शकला. या काळात भारताच्या सर्व गोलंदाजांनी अप्रतिम कामगिरी केली. जसप्रीत बुमराह संघाचा सर्वात यशस्वी गोलंदाज ठरला. त्यानं 4 षटकात 14 धावा देत 3 विकेट घेतल्या. तर हार्दिक पांड्यानं 2 फलंदाजांची विकेट घेतली. दुसरीकडे अक्षर पटेल आणि अर्शदीप सिंग यांच्या खात्यात 1-1 विकेट जमा झाली.

मोहम्मद रिझवानची एकाकी झुंज: पाकिस्तानचा संघ सातत्यानं विकेट गमावत होता. मात्र मोहम्मद रिझवान एका टोकाकडून खंबीरपणे उभा होता. त्यानं 43 चेंडूत 31 धावा केल्या होत्या. रिझवान शानदार फलंदाजी करताना पाकिस्तानला सामना जिंकवून देईल असं वाटत होत. त्यानंतर कर्णधार रोहित शर्मानं 14 वे षटक बुमराहकडे सोपवलं. या ओव्हरच्या पहिल्याच चेंडूवर बुमराहने मोहम्मद रिझवानला बोल्ड केले. रिझवान बाद होताच सामना पूर्णपणे भारताच्या बाजूनं गेला. रिझवान 44 चेंडूत 31 धावा करून बाद झाला. रिझवानच्या या विकेटनंतर भारताचे खेळाडू पूर्ण उत्साहात होते. यानंतर भारतीय गोलंदाजांनी पाकिस्तानी संघावर इतकं नियंत्रण ठेवलं की संपूर्ण संघ केवळ 113 धावाच करू शकला.

हेही वाचा