मुंबई BCCI Awards : टीम इंडियाचा स्टार वेगवान गोलंदाज जसप्रीत बुमराह आणि महिला क्रिकेट संघाची अनुभवी सलामीवीर स्मृती मंधाना यांना बीसीसीआयनं वर्षातील सर्वोत्तम क्रिकेटपटू म्हणून सन्मानित केलं. 2023-24 हंगामात मुंबईत झालेल्या बीसीसीआयच्या वार्षिक 'नमन पुरस्कार' कार्यक्रमात भारतीय क्रिकेटमधील या दोन स्टार खेळाडूंना वर्षातील सर्वात मोठ्या पुरस्कारांनी सन्मानित करण्यात आलं. या दोघांव्यतिरिक्त, मास्टर ब्लास्टर सचिन तेंडुलकरला बीसीसीआयनं भारतीय क्रिकेटमधील सर्वात मोठा जीवनगौरव पुरस्कार देऊन सन्मानित केलं. गेल्या वर्षी आंतरराष्ट्रीय क्रिकेटमधून निवृत्ती जाहीर करणारा सुपरस्टार ऑफ स्पिनर रविचंद्रन अश्विनला भारतीय क्रिकेटमधील योगदानाबद्दल विशेष सन्मानित करण्यात आलं.
बुमराह-मंधाना सर्वोत्तम क्रिकेटपटू : 2007 मध्ये, बीसीसीआयनं वर्षातील सर्वोत्तम पुरुष क्रिकेटपटूला सन्मानित करण्यासाठी माजी क्रिकेट दिग्गज पॉली उम्रीगर यांच्या नावानं हा पुरस्कार सुरु केला. पहिला पॉली उम्रीगर पुरस्कार महान फलंदाज सचिन तेंडुलकरला देण्यात आला. 1 फेब्रुवारी 2025 रोजी जसप्रीत बुमराहला या पुरस्कारानं सन्मानित करण्यात आलं. 2023-24 हंगामात वनडे विश्वचषक, T20 विश्वचषक आणि कसोटी क्रिकेटमधील उत्कृष्ट कामगिरीसाठी बुमराहला हा पुरस्कार मिळाला. बुमराहनं हा पुरस्कार दुसऱ्यांदा जिंकला आहे. यापूर्वी, त्याला 2018-19 हंगामातही हा पुरस्कार मिळाला होता.
मंधानाला मिळाला पुरस्कार :त्याच वेळी, वर्षातील सर्वोत्तम महिला आंतरराष्ट्रीय क्रिकेटपटूचा पुरस्कार पुन्हा एकदा टीम इंडियाची उपकर्णधार आणि स्टार सलामीवीर स्मृती मंधानाला देण्यात आला. मंधानानं तिच्या कारकिर्दीत चौथ्यांदा हा पुरस्कार जिंकला आहे. यापूर्वी, तिनं 2017-18 मध्ये आणि नंतर 2020-21 आणि 2021-22 हंगामातही हा पुरस्कार जिंकला होता. याशिवाय, T20 विश्वचषक जिंकणाऱ्या टीम इंडियाच्या प्रत्येक खेळाडूला बीसीसीआयच्या प्रायोजक ड्रीम11 ने 'वैयक्तिकृत अंगठी' दिली. तथापि, यावेळी विराट कोहलीसह काही खेळाडू उपस्थित नव्हते.
सचिन आणि अश्विनलाही पुरस्कार : त्याचप्रमाणे, दरवर्षीच्या पुरस्कारांप्रमाणे, यावेळीही महान फलंदाज सचिन तेंडुलकरची कर्नल सीके नायडू जीवनगौरव पुरस्कारासाठी निवड करण्यात आली. बीसीसीआयचे माजी सचिव आणि सध्याचे आयसीसी अध्यक्ष जय शाह यांनी सचिनला हा विशेष पुरस्कार दिला. यावेळी सचिननं त्याच्या दीर्घ कारकिर्दीशी संबंधित अनेक संस्मरणीय किस्सेही कथन केले आणि सध्याच्या क्रिकेटपटूंना तसंच येणाऱ्या पिढीला काही खास संदेशही दिले. त्याच वेळी, गेल्या वर्षी ऑस्ट्रेलिया दौऱ्यावर ब्रिस्बेन कसोटीनंतर आंतरराष्ट्रीय क्रिकेटमधून निवृत्तीची घोषणा करणारा अनुभवी फिरकीपटू रविचंद्रन अश्विनलाही भारतीय क्रिकेटमधील योगदानाबद्दल विशेष पुरस्कारानं सन्मानित करण्यात आलं.
हेही वाचा :
- 'फ्री'मध्ये IND VS ENG यांच्यात मुंबईत होणारी शेवटची T20I मॅच 'इथं' पाहा लाईव्ह
- Champions Trophy साठी सर्व आठ संघ जाहीर; 'हा' देश पहिल्यांदाच खेळणार
