हैदराबाद Rahul Gandhi Travels In RTC Bus : लोकसभा निवडणुकीच्या प्रचारादरम्यान, काँग्रेस नेते राहुल गांधी यांनी गुरुवारी (9 मे) रात्री तेलंगणातील हैदराबादमध्ये एका जाहीर सभेला संबोधित केलं. यानंतर राहुल गांधी यांनी तेलंगणामधील बसमधून प्रवास केला. यावेळी त्यांनी प्रवाशांशी संवादही साधला. राहुल गांधींना बसमध्ये पाहून प्रवाशीही आश्चर्यचकित झाले.
प्रवाशांशी साधला संवाद : बसमध्ये राहुल यांच्यासोबत राज्याचे मुख्यमंत्री रेवंत रेड्डीही उपस्थित होते. मलकाजगिरी लोकसभा मतदारसंघातील सरूरनगर येथे जाहीर सभेला संबोधित केल्यानंतर राहुल गांधी तेलंगणा राज्य मार्ग परिवहन महामंडळाच्या (TSRTC) बसमध्ये चढले. यावेळी राहुल गांधी यांनी प्रवाशांमध्ये 'पंच न्याय' माहितीपत्रकांचं वाटप केलं. राज्यातील काँग्रेस सरकारच्या मोफत बस प्रवास योजनेच्या अंमलबजावणीबाबत लोकांकडून माहिती घेतली. प्रवाशांशी संवाद साधताना राहुल गांधी यांनी महिला, युवक, शेतकरी आणि कामगार अशा विविध घटकांसाठी काँग्रेसनं आपल्या राष्ट्रीय जाहीरनाम्यात दिलेल्या आश्वासनांची माहिती दिली. राहुल गांधींना बसमध्ये प्रवास करताना पाहून प्रवाशांना आश्चर्य वाटले. अनेकांनी त्यांच्यासोबत सेल्फीही काढले. तेलंगणा सरकारकडून बसमध्ये महिलांना मोफत प्रवास देण्याची योजना राबविली जाते.