नाशिक : माजी मंत्री बबनराव घोलप यांनी आठ महिन्यापूर्वी शिवसेनेच्या (ठाकरे गट) सदस्य पदाचा राजीनामा देऊन शिवसेना शिंदे गटात प्रवेश केला होता. मात्र, आता बबनराव घोलप यांचे पुत्र माजी आमदार योगेश घोलप यांना देवळाली मतदारसंघातून शिवसेना ठाकरे गटाकडून उमेदवारी जाहीर झाली आहे. त्यामुळं बबनराव घोलप हे देखील पुन्हा एकदा ठाकरेंच्या शिवसेनेत प्रवेश करणार असल्याची शक्यता आहे. बबनराव घोलप हे रविवारी (27 ऑक्टोबर) पक्षप्रमुख उद्धव ठाकरे यांच्या उपस्थितीत शिवसेनेत (ठाकरे गट) घरवापसी करणार असल्याचं सांगितलं जातंय.
योगेश घोलप यांना उमेदवारी जाहीर : महाविकास आघाडीत देवळाली मतदारसंघाची जागा शिवसेना ठाकरे गटाला मिळाली आहे. माजी आमदार योगेश घोलप यांनी या जागेसाठी एबी फॉर्म मिळवलाय. याआधी, लोकसभा निवडणुकीनंतर देवळालीची जागा राष्ट्रवादी काँग्रेस शरदचंद्र पवार गटाला मिळणार असल्याची चर्चा होती. इतकंच नाही तर राष्ट्रवादी काँग्रेसनं मेळावा घेऊन आपला उमेदवार देण्याची घोषणा देखील केली होती. या पार्श्वभूमीवर देवळालीच्या जागेसाठी शिवसेना ठाकरे गटासह इतर पक्षांचे इच्छुक उमेदवार होते. पण, गेल्या पाच ते सहा दिवसांपासून देवळाली मतदारसंघातील शिवसेना (ठाकरे गट) पदाधिकारी मुंबईत तळ ठोकून होते. अखेर चर्चेनंतर या जागेचा निर्णय शिवसेना ठाकरे गटाच्या बाजूनं लागला आणि माजी आमदार योगेश घोलप यांना उमेदवारी जाहीर करण्यात आली.
नाशिक शहराच्या तीन जागा ठाकरे गटाकडं : महाविकास आघाडीमध्ये शिवसेना ठाकरे गटानं नाशिक शहरातील तीन जागा आपल्या हाती घेतल्यानं त्यांचा प्रभाव वाढलाय. यापूर्वी शहरातील मध्य विधानसभा मतदारसंघात माजी आमदार वसंत गीते आणि सुधाकर बडगुजर यांची उमेदवारी घोषित करण्यात आली होती. त्यानंतर आता देवळाली मतदारसंघातून योगेश घोलप यांना उमेदवारी जाहीर झालीय. त्यामुळं नाशिक शहरात ठाकरे गटाची ताकद वाढली आहे.