मुंबई- Vettaiyan Opening Song : रजनीकांत सध्या त्याच्या 'कुली' आणि 'वेट्टयान' या दोन ॲक्शन चित्रपटांमुळे चर्चेत आहेत. आता त्याचे चाहते त्याच्या या दोन्ही चित्रपटांची खूप आतुरतेनं वाट पाहात आहेत. दोन्ही चित्रपटांच्या प्रदर्शनाची तारीख अद्याप जाहीर करण्यात आलेली नाही. रजनीकांत सध्या 'वेट्टयान' चित्रपटाच्या शूटिंगमध्ये व्यग्र आहे. आता शूटिंगमधील 'वेट्टयान'च्या ओपनिंग सॉन्गची एक क्लिप सोशल मीडियावर व्हायरल होत आहे. या व्हिडिओमध्ये रंजनीकांत सूट-बूट घालून डान्स करताना दिसत आहे. याशिवाय या क्लिपमध्ये चित्रपट संगीतकार अनिरुद्ध रविचंदर कॅमिओ करताना दिसत आहेत. तसंच क्लिपमध्ये बाकी कलाकार देखील दिसत आहेत.
'वेट्टयान'मध्ये रजनीकांत साकारणार पोलिसाची भूमिका :व्हिडिओत अनिरुद्ध हा रजनीकांतसमोर वाकून नमस्कार आणि हाय-फाय करताना दिसत आहे. याआधी 27 फेब्रुवारी रोजी रजनीकांत हा हैदराबादमध्ये शूटिंग करताना दिसला होता. यावेळी तो पोलिसाच्या गणवेशात होता. दरम्यान रजनीकांत हा कारमधून बाहेर आल्यानंतर त्याच्या अनेक चाहत्यांनी त्याला घेरलं होतं. यानंतर रजनीकांतनं चाहत्यांना अभिवादन केलं. रजनीकांत आपल्या ड्रायव्हरबरोबर शूटिंग सेटवर पोहोचला होता. 'वेट्टयान' चित्रपटात रजनीकांत एका मुस्लिम पोलिसाच्या भूमिकेत दिसणार आहे. या चित्रपटामध्ये त्याची जबरदस्त अ‍ॅक्शन प्रेक्षकांना पाहायला मिळणार आहे.