मुंबई - Stree 2 Box Office Collection Day 4 :अभिनेत्री श्रद्धा कपूर आणि अभिनेता राजकुमार राव अभिनीत 'स्त्री 2' चित्रपटानं पहिल्या 4 दिवसात 200 कोटीचा टप्पा ओलांडला आहे. हा चित्रपट रुपेरी पडद्यावर खूप वेगानं कमाई करत आहे. 'स्त्री 2' हा देशांतर्गत बॉक्स ऑफिसवर चमकदार कामगिरी करत आहे. या चित्रपटानं रिलीजच्या पहिल्या वीकेंडमध्ये, म्हणजेच रविवारी 50 कोटींहून अधिक कमाई केली आहे. 'जवान', 'अ‍ॅनिमल' आणि 'पठाण'नंतर पहिल्या रविवारी सर्वाधिक कमाई करणारा हा चौथा चित्रपट ठरला आहे. रविवारी 'स्त्री 2'नं धमाकेदार कमाई केल्यानंतर हा चित्रपट लवकरच बॉक्स ऑफिसवर 400 कोटीचा टप्पा गाठेल असा अंदाज आता व्यक्त केला जात आहे.
'स्त्री 2' चित्रपटाचं एकूण कलेक्शन :अमर कौशिक दिग्दर्शित 'स्त्री 2' या चित्रपटानं पहिल्या वीकेंडमध्ये खळबळ उडवून दिली आहे. सॅकनिल्कच्या अंदाजानुसार, या चित्रपटानं रविवारी 58.2 कोटी रुपयांची कमाई केली आहे. यासह या चित्रपटानं 4 दिवसांत एकूण देशांतर्गत 204 कोटी रुपयांची कमाई केली आहे. चित्रपट व्यापार विश्लेषक निशित शॉ यांच्या मते, 'स्त्री 2' हा पहिल्या रविवारी जवान (रु. 71.63 कोटी), 'अ‍ॅनिमल' (63.46 कोटी) आणि 'पठाण' (58.50 कोटी) नंतर चौथा सर्वाधिक कमाई करणारा चित्रपट आहे. दरम्यान या चित्रपटानं जगभरात 283 कोटीची कमाई केली आहे.