मुंबई - Pushpa 2 the Rule 100 days : साऊथ सुपरस्टार अल्लू अर्जुनचे चाहते त्याच्या बहुचर्चित 'पुष्पा 2 द रुल'च्या रिलीजची आतुरतेनं वाट पाहत आहेत. 'पुष्पा 2 द रुल' हा चित्रपट यापूर्वी 15 ऑगस्टला प्रदर्शित होणार होता, मात्र चित्रपटाचं शूटिंग पूर्ण न झाल्यामुळे हा चित्रपट आता डिसेंबरमध्ये रुपेरी पडद्यावर प्रदर्शित होणार आहे. आज 28 ऑगस्ट रोजी 'पुष्पा 2 द रुल'च्या निर्मात्यांनी अल्लू अर्जुनच्या चाहत्यांसाठी एक खास संदेश दिला आहे. 'पुष्पा 2 द रुल' निर्मात्यांनी चित्रपटातील अल्लू अर्जुनचं एक धमाकेदार पोस्टर रिलीज केलं आहे. आज 28 ऑगस्टपासून या चित्रपटाच्या रिलीजला 100 दिवस बाकी आहेत.
'पुष्पा 2 द रुल'मधील पोस्टर रिलीज :मैत्री मूव्ही मेकर्सनं 'पुष्पा 2 द रुल' या चित्रपटातील अल्लू अर्जुनचं पोस्टर शेअर करत त्यावर लिहिलं - 'पुष्पा 2 द रुल'च्या रिलीजसाठी आता फक्त 100 दिवस उरले आहेत. हा चित्रपट 6 डिसेंबर 2024 रोजी प्रदर्शित होत आहे. दरम्यान विक्की कौशल आणि रश्मिका मंदान्ना स्टारर 'छावा' हा चित्रपटही 6 डिसेंबरला बॉक्स ऑफिसवर प्रदर्शित होत आहे. या चित्रपटाचं टीझर नुकतंच रिलीज करण्यात आलं होतं. हा टीझर पाहिल्यानंतर अनेकजण या चित्रपटाच्या रिलीजची वाट पाहात आहेत. दरम्यान रश्मिका 'पुष्पा 2 द रुल'मध्ये मुख्य भूमिकेत दिसणार आहे. आता रुपेरी पडद्यावर एकाच दिवशी प्रेक्षकांना रश्मिकाची दोन वेगवेगळ्या चित्रपटांमध्ये जादू पाहायला मिळेल.