मुंबई - Kalki 2898 AD :साऊथ अभिनेता प्रभासचा आगामी 'कल्की 2898 एडी' चित्रपट रिलीज होण्यासाठी सज्ज आहे. 10 जून रोजी निर्माते चित्रपटाचा ट्रेलर रिलीज करणार आहेत. दरम्यान रिलीजपूर्वी या चित्रपटातील दीपिका पदुकोणचं नवीन पोस्टर रिलीज करण्यात आलं आहे. या पोस्टरमध्ये तिच्या चेहऱ्यावरचे हावभाव हे नाराज असल्याचे दिसत आहे. 'कल्की 2898 एडी'च्या निर्मात्यांनी इन्स्टाग्रामवर दीपिका पदुकोणचं जबरदस्त पोस्टर शेअर करत लिहिलं, "तिच्यापासून आशा सुरू होते. 'कल्की 2898 एडी'चा ट्रेलर उद्या रिलीज होणार आहे.' पोस्टरची पार्श्वभूमी भविष्यवादी आणि भयावह आहे.
दीपिका पदुकोणचं 'कल्की 2898 एडी'मधील पोस्टर रिलीज :'कल्की 2898 एडी' या चित्रपटामध्ये दीपिका पदुकोण एका अनोख्या अंदाजात दिसणार आहे. नाग अश्विन दिग्दर्शित 'कल्की 2898 एडी' हा कलियुगात होणाऱ्या घटनेवर आधारित आहे. या चित्रपटामध्ये मनुष्य भविष्यात घडणाऱ्या आव्हानांना तोंड देताना दिसेल. दरम्यान दीपिका पदुकोणचा पती अभिनेता रणवीर सिंगनं पोस्टर रिलीज झाल्यानंतर प्रतिक्रिया दिली आहे. पोस्टरच्या कमेंट सेक्शनमध्ये त्यानं फायर इमोजीसह लिहिले, 'बूम, स्टनर.' लिहिलं आहे. 'कल्की 2898 एडी' चित्रपटात दीपिका पदुकोण व्यतिरिक्त प्रभास, अमिताभ बच्चन, कमल हासन यांसारख्या कलाकार दिसणार आहेत. हा चित्रपट 600 कोटीच्या बजेटमध्ये निर्मित करण्यात आला आहे. 'कल्की 2898 एडी' चित्रपट रुपेरी पडद्यावर 27 जून रोजी प्रदर्शित होणार आहे. या चित्रपटाची वाट चाहते खूप आतुरतेनं पाहात आहेत.