मुंबई Akshay Kumar birthday : बॉलिवूडचा खिलाडी अक्षय कुमार आज 9 सप्टेंबर रोजी त्याचा 57 वा वाढदिवस साजरा करत आहे. यानिमित्तानं त्याचे चाहते आणि अनेक सेलिब्रिटी त्याला वाढदिवसाच्या शुभेच्छा देत आहेत. दुसरीकडे अक्षयनं त्याच्या वाढदिवसानिमित्त चाहत्यांना एक सुंदर भेट दिली आहे. त्याने आज 9 सप्टेंबर रोजी आपला नवीन हॉरर कॉमेडी चित्रपट 'भूत बंगला' ची घोषणा केली आहे. याबरोबरच त्यानं 'भूत बंगला' चित्रपटामधील एक मजेदार पोस्टरही शेअर केलं आहे. यापूर्वी अक्षयनं 'भूल भुलैया' या चित्रपटातून देखील रुपेरी पडद्यावर धमाका केला होता. 'भूत बंगला' चित्रपटातील अक्षय कुमारचा फर्स्ट लूक खूपच इंटरेस्टिंग आहे.
अक्षय कुमारनं केली नवीन चित्रपटाची घोषणा :पोस्टरमध्ये अक्षय कुमारच्या खांद्यावर एक काळी मांजर बसली असल्याचं दिसत आहे. याशिवाय अक्षयच्या हातात एक वाटी आहे, यात दूध असून अक्षय त्याला जीभ लावताना दिसत आहे. याशिवाय त्यातच्या मागे एक भुतानं पछाडलेला बंगला दिसत आहे. अक्षयनं शेअर केलेलं पोस्टर आता त्याच्या चाहत्यांना खूप आवडत आहे. या पोस्टरवर अनेकजण कमेंट्स करून आपल्या प्रतिक्रिया देताना दिसत आहेत. अक्षयनं आता रोमान्समधून बाहेर पडून हॉरर चित्रपटांमध्ये काम करण्याचा विचार केला आहे. अक्षय 14 वर्षांनंतर प्रियदर्शनबरोबर काम करणार आहे. त्याला या चित्रपटाकडून खूप अपेक्षा आहेत. कारण त्याचे आतापर्यंत अनेक चित्रपट बॉक्स ऑफिसवर फ्लॉप झाले आहेत. आता तो या चित्रपटाद्वारे नक्कीच चाहत्याचं मन जिंकेल अशी आशा आहे.