छत्तीसगडमध्ये भीषण अपघात: मालवाहू वाहन- ट्रकच्या धडकेत आठ जणांचा मृत्यू, 23 जखमी - bemetara Road Accident

Bemetara Road Accident : छत्तीसगडमधील बेमेटारा इथं झालेल्या भीषण अपघातात 8 जणांचा मृत्यू झालाय. बेमेटारा जिल्ह्यातील काठिया गावाजवळ रविवारी रात्री हा अपघात झाला.

बेमेटारा (छत्तीसगड) Bemetara Road Accident : छत्तीसगडमधील बेमेटारा जिल्ह्यातील काठिया गावातील पेट्रोल पंपाजवळ रविवारी रात्री एक भीषण अपघात झालाय. मालवाहू वाहन आणि ट्रक यांच्यात जोरदार धडक झालीय. या अपघातात पाच महिला आणि तीन मुलांचा मृत्यू झालाय. तर वाहनातील इतर 23 जण जखमी झाले आहेत. या जखमींना बेमेटारा जिल्हा रुग्णालय, सिमगाच्या सामुदायिक आरोग्य केंद्रात पाठवण्यात आलं. काही गंभीर जखमींना रायपूरच्या एम्समध्ये पाठवण्यात आलंय.

रविवारी रात्री काठीया गावाजवळ घडला अपघात : पोलिसांनी दिलेल्या माहितीनुसार, रविवारी रात्री उशिरा बेमेटारा जिल्ह्यातील काठिया गावाजवळ हा अपघात झाला. बेमेटारा जिल्ह्यातील पाथरा गावातील लोक नामकरण सोहळ्यासाठी तिरैया गावात गेले होते. एका कौटुंबिक कार्यक्रमात सहभागी होऊन सर्वजण पतर्रा गावी घरी परतत होते. मालवाहू वाहन रस्त्याच्या कडेला उभ्या असलेल्या मिनी ट्रकला धडकलं. या अपघातात पाच महिला आणि तीन मुलांचा मृत्यू झाला. तर यातील 23 जखमींना दोन रुग्णालयात दाखल करण्यात आलंय. चार गंभीर जखमींना रायपुरच्या ऑल इंडिया इन्स्टिट्यूट ऑफ मेडिकल सायन्सेसमध्ये पाठवण्यात आलंय.

बेमेटराचे जिल्हाधिकारी-एसपी, आमदार रुग्णालयात : या अपघाताची माहिती मिळताच बेमेटराचे आमदार दीपेश साहू, जिल्हाधिकारी रणवीर शर्मा आणि एसपी रामकृष्ण साहू यांनी जिल्हा रुग्णालयात पोहोचून जखमींची भेट घेतली. मृतांच्या कुटुंबीयांची भेट घेऊन सांत्वन केल्याचे बेमेटाराचे जिल्हाधिकारी रणवीर शर्मा यांनी सांगितलं.

"आठ जणांचा मृत्यू झाल्याचं वृत्त आहे. जखमींना बेमेटारा जिल्हा रुग्णालय, सिमगा रुग्णालय आणि एम्स रायपूर इथं पाठवण्यात आलंय. डॉक्टरांशी बोलल्यानंतर योग्य उपचार करण्याच्या सूचना देण्यात आल्या आहेत. मृतदेहांचं शवविच्छेदन करण्यात येईल. जी काही सरकारी मदत मिळेल, ती मृतांच्या कुटुंबीयांना देण्यास सांगितलंय." - रणवीर शर्मा, जिल्हाधिकारी, बेमेटारा

पाच महिला आणि तीन मुलांचा मृत्यू : या अपघातात जखमी झालेल्या सर्व 23 जणांना उपचारासाठी रुग्णालयात पाठवण्यात आलंय. तर अपघातात मृत्युमुखी पडलेल्यांची ओळखही पटली आहे. यामध्ये भूरी निषाद (50), नीरा साहू (55), गीता साहू (60), अग्नि साहू (60), खुशबू साहू (39), मधु साहू (5), रिकेश निषाद (6) आणि ट्विंकल निषाद (6) यांचा समावेश आहे. पोलिसांनी दिलेल्या माहितीनुसार, अपघातातील सर्व लोक पतर्रा गावातील रहिवासी आहेत.

हेही वाचा :