കോഴിക്കോട്:താമരശേരിയിൽ മോഷണ പരമ്പര നടത്തിയ കേസിലെ പ്രതി പൊലീസിൻ്റെ പിടിയിൽ. നിരവധി കേസുകളിലെ പിടികിട്ടാപ്പുള്ളിയായ കുപ്രസിദ്ധ അന്തര്‍ സംസ്ഥാന മോഷ്‌ടാവ് ഷാജിമോനാണ് താമരശേരി പൊലീസിൻ്റെ പിടിയിലായത്.
താമരശേരിയില്‍ ഒന്‍പത് വീടുകളില്‍ നടന്ന മോഷണത്തിൻ്റെ അന്വേഷണം പൊലീസ് ഊർജ്ജിതമാക്കിനടത്തുന്നതിനിടയിലാണ് ഷാജിമോന്‍ പിടിയിലാവുന്നത്. ബന്ദിപ്പൂര്‍ വഴി കര്‍ണ്ണാടയിലേക്ക് കടക്കാനുള്ള ശ്രമത്തിനിടയിലാണ് ഇയാള്‍ പൊലീസിന്‍റെ വലയിലായത്. ഷാജിമോനെ പിന്തുടര്‍ന്ന താമരശേരി പൊലീസ് ഗൂഢല്ലൂരില്‍ വെച്ച് ഇയാളെ പിടികൂടുകയായിരുന്നു.
ഇടിവി ഭാരത് കേരള വാട്‌സ്‌ആപ്പ് ചാനലില്‍ ജോയിന്‍ ചെയ്യാന്‍ ഈ ലിങ്കില്‍ ക്ലിക്ക് ചെയ്യുക.
പ്രതി താമരശേരിയിലും പരിസര പ്രദേശങ്ങളിലും മോഷണം നടത്താന്‍ പോകുന്നതിൻ്റെ സിസിടിവി ദൃശ്യങ്ങള്‍ പൊലീസിന് ലഭിച്ചിരുന്നു. ഇത് കേന്ദ്രീകരിച്ച് നടത്തിയ അന്വേഷണത്തിലാണ് പ്രതിയെ കുറിച്ച് പൊലീസിന് സൂചന കിട്ടിയത്. തുടര്‍ന്ന് നടത്തിയ അന്വേഷണത്തിലാണ് ഇയാള്‍ സംസ്ഥാനം വിടുന്നതായി മനസിലാക്കാനായത്. സംസ്ഥാനത്ത് മാത്രം ഇയാള്‍ക്കെതിരെ അറുപതോളം കേസുകള്‍ ഉണ്ടെന്ന് പൊലീസ് അറിയിച്ചു.
സംസ്ഥാനത്തിന് പുറത്തും ഇയാള്‍ക്കെതിരെ കേസുകളുണ്ടെന്നാണ് പ്രാഥമിക വിവരം. താമരശേരി പൊടുപ്പില്‍ നഗറിലാണ് ഷാജി മോൻ വാടകക്ക് താമസിച്ചിരുന്നത്. നാട്ടുകാരോട് നല്ല രീതിയില്‍ പെരുമാറിയ ഇയാള്‍ സംശയത്തിന് വഴിവെച്ചിരുന്നില്ല. എന്നാൽ പൊലീസിൻ്റെ പഴുതടച്ച അന്വേഷണമാണ് പ്രതിയെ കുടുക്കിയത്. താമരശേരി പൊലീസിനൊപ്പം റൂറല്‍ എസ്‌പിയുടെ നേതൃത്ത്വത്തിലുള്ള സ്‌ക്വാഡും പ്രതിയെ പിടികൂടുന്നതിന് നേതൃത്വം നൽകി.
Also Read: ഓൺലൈൻ വാതുവെപ്പിനായി സ്വിഗ്ഗിയുടെ ഏഴ് കോടി രൂപ വെട്ടിച്ചു; ഇവൈ കമ്പനി ജീവനക്കാരന്‍ അറസ്‌റ്റിൽ
