കാസർകോട്: ശരീരത്തിനും ഹൃദയത്തിനും മികച്ചൊരു വ്യായാമമാണ് നീന്തൽ. ദിവസവും ഒരു മണിക്കൂർ നീന്തുന്നത് കലോറി കുറയ്ക്കാൻ സഹായിക്കുന്നു. തീവ്രത കുറഞ്ഞ വ്യായാമമാണ് നീന്തൽ. ഒപ്പം സ്വയരക്ഷയ്ക്കും നീന്തൽ അത്യാവശ്യമാണ്. കാലവർഷത്തിൽ മഴ തിമിർത്ത് പെയ്യാൻ തുടങ്ങിയാൽ പാടങ്ങളും കുളങ്ങളും നിറയും.
സ്‌കൂൾ തുറക്കുന്നതോടെ വെള്ളകെട്ടിൽ വീണ് കുട്ടികൾക്ക് അപകടം സംഭവിക്കുന്നത് പതിവ് കാഴ്‌ചയാണ്. കുട്ടികൾക്ക് നീന്തൽ വശമില്ലാത്തതാണ് പ്രാധാന പ്രശ്‌നം. എന്നാൽ പാണ്ടിക്കണ്ടത്തെ കുട്ടികൾക്ക് വെള്ളത്തെ പേടിക്കേണ്ട. അവധിക്കാലം ഉല്ലാസമാക്കി നീന്തൽ പരിശീലനത്തിലാണ് അവർ. വേനൽ ചൂടിൽ ശരീരവും മനസും കുളിർപ്പിച്ച് മുങ്ങിയും പൊങ്ങിയും തുള്ളിച്ചാടിയും പാണ്ടിക്കണ്ടം പുഴയിലൂടെ നീന്തി തുടിക്കുകയാണ് കുട്ടികൾ.
ഏപ്രിൽ ഏഴിനാണ് പ്രത്യേക നീന്തൽ പരിശീലനം ആരംഭിച്ചത്. 22 ദിവസം നീണ്ടു നിൽക്കുന്നതായിരുന്നു പരിശീലനം. അജയൻ കളവയൽ വായനശാലയുടെ നേതൃത്വത്തിലാണ് കുട്ടികൾക്ക് വേനലവധിക്കാലം ഉപകാരപ്രദമാകാൻ പരിശീലനം നൽകുന്നത്. അതിനു പിന്നിൽ പറയാൻ മികച്ചൊരു ആശയമുണ്ട്. മുങ്ങി മരണങ്ങൾ റിപ്പോർട്ട് ചെയ്യുന്ന സാഹചര്യത്തിൽ ഭാവി തലമുറയെ നീന്തൽ പരിശീലനത്തിലൂടെ സ്വയരക്ഷയ്ക്കും സമൂഹത്തിന്‍റെ രക്ഷയ്ക്കും പ്രാപ്‌തരാക്കുക എന്നതാണ് ലക്ഷ്യം.
യുകെജി മുതൽ പ്ലസ് ടു വരെയുള്ള 65 ഓളം കുട്ടികളാണ് നീന്തൽ പഠിക്കാൻ മുന്നോട്ടുവന്നത്. രക്ഷിതാക്കളും പിന്തുണ നൽകി. ആദ്യമൊക്കെ വെള്ളം കാണുമ്പോൾ കുട്ടികൾ അലറി വിളിച്ചെന്നും ഇപ്പോൾ എല്ലാവരും നീന്തൽ പഠിച്ചുവെന്നും പരിശീലകൻ ശശിധരൻ പറയുന്നു. സൗജന്യമായാണ് പരിശീലകൻ ശശിധരൻ കുട്ടികൾക്ക് വേണ്ടി പരിശീലനം നൽകുന്നത്.
ആദ്യ ഘട്ടത്തിൽ ഫയർ ഓഫീസർമാരായ പ്രസീത്, സുരേഷും ഉണ്ടായിരുന്നു.
കുട്ടികൾക്ക് നീന്തൽ പരിശീലനം അത്യാവശ്യമാണെന്നും ഇനിയും കുട്ടികളെ പഠിപ്പിക്കാൻ തയ്യാറാണെന്നും ശശിധരൻ പറഞ്ഞു. ഇനി ഈ പ്രദേശത്തെ മുതിർന്നവരെയും നീന്തൽ പരിശീലിപ്പിക്കാൻ ഒരുങ്ങുകയാണ് വായനശാലയും ശശിധരനും.