'രാജിവയ്‌ക്കുന്നുവെന്നത് വ്യാജ പ്രചരണം'; മോദി മന്ത്രിസഭയില്‍ അംഗമായതില്‍ സന്തോഷമെന്ന് സുരേഷ്‌ ഗോപി - SURESH GOPI ABOUT SPECULATION

തനിക്കെതിരെയുള്ള വ്യാജ പ്രചരണത്തില്‍ പ്രതികരിച്ച് സുരേഷ്‌ ഗോപി. മാധ്യമങ്ങളിലൂടെയുള്ള പ്രചരണം തെറ്റാണ്. മോദി മന്ത്രിസഭയില്‍ അംഗമായതില്‍ അഭിമാനിക്കുന്നുവെന്നും സുരേഷ്‌ ഗോപി.

തിരുവനന്തപുരം:മോദി മന്ത്രിസഭയിലെ അംഗമായതില്‍ അഭിമാനമെന്ന് ബിജെപി എംപി സുരേഷ്‌ ഗോപി. മന്ത്രിസഭയില്‍ സഹമന്ത്രിയായി തന്നെ തുടരുമെന്നും അദ്ദേഹം പറഞ്ഞു. മോദി മന്ത്രിസഭയിലെ അംഗത്വം രാജിവയ്‌ക്കാന്‍ പോകുകയാണെന്ന് ഏതാനും മാധ്യമങ്ങളില്‍ വാര്‍ത്തകള്‍ പ്രചരിച്ചതിന് പിന്നാലെയാണ് സുരേഷ്‌ ഗോപി പ്രതികരണവുമായെത്തിയത്.

ഫേസ് ബുക്കിലൂടെയാണ് അദ്ദേഹം വിഷയത്തില്‍ പ്രതികരിച്ചത്. മോദി സര്‍ക്കാരിന്‍റെ മന്ത്രിസഭയിലെത്തി കേരളത്തിലെ ജനങ്ങളെ പ്രതിനിധീകരിക്കാന്‍ കഴിഞ്ഞതില്‍ വളരെയധികം അഭിമാനമാണെന്നും സുരേഷ്‌ ഗോപി പറഞ്ഞു. മാധ്യമങ്ങളില്‍ വന്നത് തീര്‍ത്തും തെറ്റായ പ്രചരണമാണ്. പ്രധാനമന്ത്രിയുടെ നേതൃത്വത്തില്‍ കേരളത്തിന്‍റെ വികസനത്തിനും സുസ്ഥിരതയ്‌ക്കും വേണ്ടി നിലകൊള്ളുമെന്നും സുരേഷ്‌ ഗോപി ഫേസ് ബുക്ക് പേസ്‌റ്റില്‍ പറയുന്നു.

ലോക്‌സഭ തെരഞ്ഞെടുപ്പ് ഫലപ്രഖ്യാപനത്തിന് പിന്നാലെ ബിജെപി വാഗ്‌ദാനം ചെയ്‌ത കാബിനറ്റ് പദവി സുരേഷ്‌ ഗോപിക്ക് ലഭിക്കാത്തതില്‍ അതൃപ്‌തിയുണ്ടെന്ന് മാധ്യമങ്ങള്‍ റിപ്പോര്‍ട്ട് ചെയ്‌തിരുന്നു. സഹമന്ത്രി സ്ഥാനം നല്‍കി അദ്ദേഹത്തെ ഒതുക്കിയെന്നും അതില്‍ പ്രതിഷേധിച്ച് രാജിവയ്‌ക്കാനൊരുങ്ങുകയാണെന്നുമാണ് പ്രചരണമുണ്ടായത്. അതേസമയം താന്‍ ഏറ്റെടുത്ത സിനിമകള്‍ പൂര്‍ത്തിയാക്കാനുണ്ടെന്നും അതുകൊണ്ട് ഭാരിച്ച ഉത്തരവാദിത്വം ഏറ്റെടുക്കാന്‍ സാധിക്കില്ലെന്നും അതാണ് കാബിനറ്റ് പദവി വേണ്ടെന്ന് വയ്‌ക്കാന്‍ കാരണമെന്നുമാണ് സുരേഷ്‌ ഗോപിയുടെ വാദം.