കോഴിക്കോട്: മലഞ്ചരക്ക് കടയില്‍ മോഷണം നടത്തിയ കേസിൽ രണ്ടാം പ്രതിയും പിടിയില്‍. നരിക്കുനി സ്വദേശി സജേഷി(34)നെയാണ് ബാലുശേരി പൊലീസ് അറസ്‌റ്റ് ചെയ്‌തത്. വിപണിയില്‍ രണ്ടര ലക്ഷത്തോളം രൂപ വില വരുന്ന 800 കിലോഗ്രാം പൊളിച്ച അടക്കയും 15,000 രൂപയും കവര്‍ന്ന കേസിലാണ് സജേഷ് പിടിയിലായത്.
അഷ്‌റഫ് എന്നയാളുടെ ഉടമസ്ഥതയിലുള്ള ബാലുശേരി കരിയാത്തന്‍കാവില്‍ പ്രവര്‍ത്തിക്കുന്ന മലഞ്ചരക്ക് കടയില്‍ കഴിഞ്ഞ ഫെബ്രുവരി 26നാണ് മോഷണം നടന്നത്. മോഷ്‌ടാക്കള്‍ കടയുടെ പൂട്ട് പൊളിച്ച്‌ അകത്തു കടക്കുകയായിരുന്നു. കേസിലെ ഒന്നാം പ്രതിയായ ഏഴുകുളം സ്വദേശി ആഷിഖ് സംഭവം നടന്ന് മൂന്ന് ദിവസങ്ങള്‍ക്ക് ശേഷം പിടിയിലായിരുന്നു.