മണ്ഡലം പ്രസിഡൻ്റുമാർക്കെതിരെ തുറന്നടിച്ച് രാജ്മോഹൻ ഉണ്ണിത്താൻ (source: ETV Bharat Reporter)
കാസർകോട് :ചില പ്രാദേശിക നേതാക്കള്‍ തെരഞ്ഞെടുപ്പ് ഫണ്ട് മുക്കിയെന്ന ആരോപണവുമായി കാസര്‍കോട്ടെ യുഡിഎഫ് സ്ഥാനാര്‍ഥി രാജ്മോഹൻ ഉണ്ണിത്താൻ. പെരിയ ഇരട്ട കൊലപാതകക്കേസ് പ്രതിയുടെ മകന്‍റെ കല്യാണത്തിൽ കോൺഗ്രസ്‌ നേതാക്കൾ പങ്കെടുത്തതുമായി ബന്ധപ്പെട്ടുണ്ടായ വിവാദത്തിന് തൊട്ടുപിന്നാലെയാണ് രാജ്മോഹൻ ഉണ്ണിത്താന്‍ അടുത്ത വെടിപൊട്ടിച്ചിരിക്കുന്നത്. ചില വിദ്വാൻമാർ തെരഞ്ഞെടുപ്പ് ഫണ്ട് മുക്കിയെന്നും ബൂത്ത് കമ്മിറ്റികൾക്ക് നൽകാൻ ഏൽപ്പിച്ച പണമാണ് അവര്‍ തട്ടിയതെന്നും രാജ്മോഹൻ ഉണ്ണിത്താൻ തുറന്നടിച്ചു.
പണം തട്ടിയെടുത്തവരെ അറിയാം. ആരെയും വെറുതെ വിടില്ലെന്നും ഉണ്ണിത്താന്‍ പറഞ്ഞു. മണ്ഡലം പ്രസിഡൻ്റുമാർക്കും ബ്ലോക്ക് പ്രസിഡൻ്റുമാർക്കും യുഡിഎഫ് കമ്മിറ്റികള്‍ക്കുമെല്ലാം ആവശ്യമായ പണം നൽകി. എന്നാൽ ബൂത്തിൽ കൊടുക്കേണ്ട പണം ചിലർ തട്ടിയെന്നാണ് ഉണ്ണിത്താന്‍റെ ആരോപണം.