നെല്ലുണ്ട് പക്ഷേ വിലയില്ല; വില കുറച്ചാലും ഏറ്റെടുക്കാൻ ആളില്ല: കോട്ടയത്തെ നെൽ കർഷകർ കണ്ണീരിൽ - PADDY STORAGE ISSUE IN KOTTAYAM

അധ്വാനം പാഴായി പോയതിന്‍റെ ദുഃഖത്തിൽ നിസഹയരായി നിൽക്കുകയാണ് കർഷകർ. ഏറ്റെടുക്കാനാളില്ലാതെ വന്നതോടെ നെല്ല് വഴിയോരത്ത് കൂട്ടിയിട്ട് മൂടി സൂക്ഷിക്കുകയാണിവർ.

കോട്ടയം:ഏറ്റെടുക്കാൻ മില്ലുകാരില്ലാത്തതിനാൽ നെൽ കർഷകർ കണ്ണീരിൽ. കോട്ടയം അയ്‌മനം കല്ലുങ്ക പാടശേഖരത്തിൽ 15 ദിവസമായി കൊയ്‌തെടുത്ത നെല്ല് മൂടി സൂക്ഷിക്കുകയാണ് കർഷകർ. മഴ കനത്തതോടെ നെല്ല് സൂക്ഷിക്കാനാവാത്ത അവസ്ഥയിൽ നടത്തിയ അധ്വാനം പാഴായി പോയതിന്‍റെ ദുഃഖത്തിൽ നിസഹയരായി നിൽക്കുകയാണ് കർഷകർ.

അയ്‌മനം പഞ്ചായത്തിലെ കല്ലുങ്കത്ര , ഒളവക്കരി , കൊടുവത്ര പാട ശേഖരങ്ങളിൽ കൃഷിചെയ്യുന്ന കർഷകരാണ് ദുരിതമനുഭവിക്കുന്നത്. കല്ലുങ്കത്ര പാടശേഖരത്ത് നെല്ല് സംഭരണം ഇനിയും നടന്നിട്ടില്ല. ഇവിടെ 100 ഏക്കറോളം വരുന്ന പാടശേഖരത്തെ നെല്ല് കൊയ്‌തെടുത്തിട്ടു 15 ദിവസം കഴിഞ്ഞും നെല്ല് ഏറ്റെടുക്കാനാളില്ലാതെ വന്നതോടെ വഴിയോരത്ത് കൂട്ടിയിട്ട് മൂടി സൂക്ഷിക്കുകയാണ് കർഷകർ.

വേനൽ മഴ കനത്തത്തോടെ നെല്ല് കൂനയുടെ അടിഭാഗത്തെ നെല്ല് കിളിർത്തു തുടങ്ങി. ഇനി അധിക നാൾ നെല്ല് ഇതുപോലെ സൂക്ഷിക്കാനാകില്ല. വീടുകളിൽ വെള്ളം കയറുന്നതിനാൽ നെല്ല് സൂക്ഷിക്കാൻ മറ്റു മാർഗമില്ലെന്ന് കർഷകനായ സാനു പറഞ്ഞു. 21ഏക്കറിൽ 22 ക്വിന്‍റൽ നെല്ല് കിട്ടിയിരുന്നിടത്ത് ഉഷ്‌ണ തരംഗം മൂലം അഞ്ച് ക്വിന്‍റൽ നെല്ല് മാത്രമാണ് കർഷകർക്ക് കിട്ടിയത്. ഇത് വലിയ സാമ്പത്തിക നഷ്‌ടമാണ് കർഷകർക്ക് ഉണ്ടാക്കിയത്.

കൊടിയ ചൂടുമൂലം നെൽ ചെടികൾ കരിഞ്ഞു. വേനൽ മഴയിൽപാടത്ത് വെള്ളം കയറിയും ചെടികൾ നശിച്ചു. ശേഷിച്ചവ കൊയ്തെടുക്കാനാകാതെ വെള്ളത്തിൽ കിടക്കുകയാണ്. കിഴിവ് എത്ര വേണമെങ്കിലും നൽകാൻ സന്നദ്ധരാണ് കർഷകർ എന്നാൽ സപ്ളൈകൊ വേണ്ടരീതി യിൽ ഇടപെട്ടില്ലെന്നും കർഷകർ ആരോപിച്ചു.

തെട്ടടുത്ത് ഒളവക്കരി കൊടുവത്ര പാടശേവരത്ത് 13 ഉം 20 ഉം കിലോ കിഴിവിൽ ആണ് കർഷകരിൽ നിന്ന് നെല്ല് ഏറ്റെടുത്തത്. അവിടെ സംഭരണം നടന്നു വരികയാണ്. 60 ക്വിന്‍റലോളം നെല്ല് ഇനി കയറ്റി വിടാനുണ്ട്. കല്ലുങ്കത്ര പാടശേഖരത്താണ് നെല്ലാണ് ഏറ്റെടുക്കാൻ ആളില്ലാതായിരിക്കുന്നത്. മഴ കനത്ത സാഹചര്യ ത്തിൽ ഇനിയെങ്കിലും നെല്ല് ഏറ്റെടുത്തിലല്ലെങ്കിൽ ഭീമമായ നഷ്‌ടമാകും കർഷകർക്ക് ഉണ്ടാകുന്നത്.