പടയപ്പയും കലിപ്പില്‍; മൂന്നാറിൽ ലോറി തടഞ്ഞ് പടയപ്പ, ഒരു മണിക്കൂറിലേറെ നേരം ഗതാഗത തടസ്സമുണ്ടാക്കി

തല കൊണ്ട് ലോറിയിൽ ഇടിച്ച പടയപ്പ പിന്നീട് ലോറിക്ക് മുന്നിൽ നിലയുറപ്പിക്കുകയായിരുന്നു.

ഇടുക്കി: മൂന്നാർ നയമക്കാട് എസ്റ്റേറ്റ് വഴിയിൽ സിമന്‍റ് കയറ്റിവന്ന ലോറി തടഞ്ഞ് കാട്ടാന പടയപ്പ. ഇന്നലെ രാവിലെയായിരുന്നു നയമക്കാടിന് സമീപം മൂന്നാര്‍ ഉദുമല്‍പ്പെട്ട അന്തര്‍ സംസ്ഥാന പാതയിലിറങ്ങിയ കാട്ടുകൊമ്പന്‍ പടയപ്പ സിമന്‍റ് കയറ്റി വന്ന ലോറി തടഞ്ഞ് ആക്രമണം നടത്തിയത്.

പടയപ്പ കൊമ്പ് ഉപയോഗിച്ച് ലോറി പിറകോട്ട് തള്ളി നീക്കുകയായിരുന്നു. പടയപ്പയെ കണ്ട ലോറി ഡ്രൈവര്‍ ലോറി പിന്നിലേക്ക് എടുക്കാന്‍ തുടങ്ങി. ഈ സമയത്താണ് ആന ലോറി തള്ളിമാറ്റാന്‍ ശ്രമിച്ചത്. തല കൊണ്ട് ലോറിയിൽ ഇടിച്ച പടയപ്പ പിന്നീട് ലോറിക്ക് മുന്നിൽ റോഡിൽ നിലയുറപ്പിക്കുകയായിരുന്നു. ഇത് ഏറെ ആശങ്ക ഉയര്‍ത്തി.

ഒരു മണിക്കൂറോളം കാട്ടാന റോഡില്‍ നിലയുറപ്പിച്ചതോടെ ഗതാഗത തടസ്സവും ഉണ്ടായി. തോട്ടം തൊഴിലാളികൾ ബഹളം വച്ചതിനെ തുടർന്നാണ് ആന അവിടെ നിന്ന് പോയത്. ആന പിന്മാറിയതോടെ ഡ്രൈവര്‍ ലോറി സുരക്ഷിത സ്ഥാനത്തേക്ക് മാറ്റി. പടയപ്പ വാഹനം തള്ളി നീക്കുന്ന ദൃശ്യങ്ങൾ സോഷ്യൽ മീഡിയയിൽ വെെറലാകുന്നുണ്ട്.

സിമന്‍റ് കയറ്റി വന്ന ലോറിക്ക് നേരെയുണ്ടായ കാട്ടുകൊമ്പന്‍ പടയപ്പയുടെ ആക്രമണത്തിന് പുറമെ വേറെയും വാഹനങ്ങള്‍ പടയപ്പ ആക്രമിച്ചു. ഇന്നലെ വൈകിട്ടായിരുന്നു സംഭവം നടന്നത്. മൂന്നാര്‍ കന്നിമല ഭാഗത്തെത്തിയ പടയപ്പ വീണ്ടും അന്തര്‍ സംസ്ഥാന പാതയിലിറങ്ങി. കാറിനും ഇരുചക്ര വാഹനത്തിന് നേരെയും ആക്രമണം നടത്തി.

മൂന്നാര്‍ സ്വദേശികളായ രണ്ടുപേര്‍ സഞ്ചരിച്ച കാറും, രണ്ട് ബൈക്ക് യാത്രികരുമാണ് തലനാരിഴയ്ക്ക് പടയപ്പയുടെ ആക്രമണത്തില്‍ നിന്നും രക്ഷപ്പെട്ടത്. തേയിലക്കാട്ടിനുള്ളില്‍ മറ്റ് ആനകള്‍ നില്‍ക്കുന്നതുകണ്ട് ഫോട്ടോ എടുക്കാന്‍ വാഹനം നിര്‍ത്തി ഇറങ്ങിയതാണ് യാത്രികര്‍.

അപ്രതീക്ഷിതമായി പടയപ്പ കാറിനടുത്തെത്തി കൊമ്പുകൊണ്ട് അമര്‍ത്തി. കാറിന്‍റെ മുകള്‍വശം തകര്‍ത്തു. ശേഷം പടയപ്പ ബൈക്ക് രണ്ടും താഴെയിട്ട് ചവിട്ടി. വാഹനങ്ങളില്‍ ആളുകള്‍ ഇല്ലാതിരുന്നതിനാല്‍ വലിയ അപകടങ്ങൾ ഒഴിവായി.

കുറച്ചുസമയം വാഹനങ്ങള്‍ക്ക് സമീപം നിന്ന് ഭീകരാന്തരീക്ഷം സൃഷ്‌ടിച്ച പടയപ്പ പിന്നീട് തേയിലക്കാട്ടിനുള്ളിലേക്ക് പോയി. നിരവധി വാഹനങ്ങളാണ് ഗതാഗത കുരുക്കില്‍പ്പെട്ടത് (Padayappa stopped a cement lorry on Nayamakkad Estate Road Munnar).

പൊതുവെ ശാന്ത സ്വഭാവക്കാരനാണ് പടയപ്പയെങ്കിലും സമീപ ദിവസങ്ങളില്‍ ആന ആക്രമണ സ്വഭാവം കാണിക്കുന്നത് ആളുകളില്‍ ആശങ്ക ജനിപ്പിച്ചിട്ടുണ്ട്. ജനവാസ മേഖലയിലൂടെ പടയപ്പ ചുറ്റിത്തിരിയുന്നതാണ് ഭയപ്പാടിന് കാരണം. കാട്ടുകൊമ്പനെ ഉള്‍വനത്തിലേക്ക് തുരത്തണമെന്നാണ് ഇപ്പോള്‍ നാട്ടുകാരുടെ ആവശ്യം.