മൂന്നാറിൽ വീണ്ടും പടയപ്പ (ETV Bharat)
ഇടുക്കി : മൂന്നാറിൽ വീണ്ടും കാട്ടുകൊമ്പൻ പടയപ്പ ഇറങ്ങി. മൂന്നാർ ചെണ്ടുവര എസ്റ്റേറ്റ് ലോവർ ഡിവിഷനിലാണ് ഇന്നലെ (ജൂലൈ 2) വൈകുന്നേരം കാട്ടാന എത്തിയത്. തൊഴിലാളി ലയങ്ങളോട് ചേർന്ന് കൃഷിയിറക്കിയിരുന്നയിടത്തെ പച്ചക്കറികൾ ഭക്ഷിച്ചു. മഴക്കാലമരംഭിച്ചിട്ടും മൂന്നാറിലെ ജനവാസ മേഖലയിൽ നിന്നും പടയപ്പ പിൻവാങ്ങാതായതോടെ പ്രദേശവാസികൾ ആശങ്കയിലാണ്.
ദിവസങ്ങൾക്ക് മുമ്പ് മറയൂർ മേഖലയിലൂടെയായിരുന്നു പടയപ്പ ചുറ്റിത്തിരിഞ്ഞിരുന്നത്. ഇവിടെ നിന്നും വീണ്ടും മൂന്നാർ മേഖലയിലേക്ക് എത്തുകയായിരുന്നു. ജനവാസമേഖലയിലൂടെ ഏറെനേരം ചുറ്റിത്തിരിഞ്ഞ ആന എസ്റ്റേറ്റ് റോഡിൽ ഇറങ്ങി. മാട്ടുപ്പെട്ടി, കന്നിമല, കല്ലാർ മേഖലകളിലെ സ്ഥിരം സാന്നിധ്യമായിരുന്ന പടയപ്പ മെയ് അവസാനത്തോടെയായിരുന്നു മറയൂർ മേഖലയിലേക്ക് പിൻവാങ്ങിയത്.