നിപ വൈറസ്: 9 പേരുടെ സാമ്പിളുകൾ നെഗറ്റീവ്, മലപ്പുറത്തേത് 2023ല്‍ കണ്ടെത്തിയ വൈറസ് വകഭേദം - Nipah Virus Test Result Negative

മലപ്പുറത്തെ നിപ വൈറസ് ബാധിതന്‍റെ സമ്പര്‍ക്കപ്പട്ടികയിലുള്ള 9 പേരുടെ സാമ്പിളുകള്‍ നെഗറ്റീവ്. സമ്പർക്ക പട്ടികയിൽ ഉള്ളത് 406 പേർ. വൈറോളജി ലാബിലേക്കയച്ചത് 13 പേരുടെ സാമ്പിളുകള്‍.

കോഴിക്കോട്:മലപ്പുറത്ത്നിപ വൈറസ് ബാധിച്ച് മരിച്ച പതിനാലുകാരന്‍റെ സമ്പർക്കപ്പട്ടികയിൽ ഉൾപ്പെട്ട 9 പേരുടെ സാമ്പിള്‍ പരിശോധന ഫലം നെഗറ്റീവ്. 13 പേരുടെ സാമ്പിളുകളാണ് വൈറോളജി ഇൻസ്‌റ്റിറ്റ്യൂട്ടിലേക്ക് അയച്ചിരുന്നത്. 4 പേരുടെ പരിശോധന ഫലം കൂടി ലഭിക്കാനുണ്ട്.

മരിച്ച 14 കാരന്‍റെ സമ്പർക്ക പട്ടികയിൽ 406 പേരാണുളളത്. ഇവരിൽ 194 പേർ ഹൈ റിസ്‌ക് വിഭാഗത്തിലുള്ളവരാണ്. അതിൽ 139 പേർ ആരോഗ്യപ്രവർത്തകരാണ്. നിപ ബാധിച്ച് 14 കാരൻ മരിച്ച പ്രദേശത്തെ 7,239 വീടുകളിൽ ആരോഗ്യ വകുപ്പ് സർവേ നടത്തി.

സര്‍വേയില്‍ 439 പേർ പനി ബാധിതരാണെന്നും കണ്ടെത്തി. ഇതിൽ 4 പേർ കുട്ടിയുമായി സമ്പർക്കമുള്ളവരാണ്. 2023ൽ കണ്ടെത്തിയ അതേ വൈറസ് വകഭേദമാണ് ഇപ്പോഴും സ്ഥിരീകരിച്ചതെന്നും ആരോഗ്യമന്ത്രി വീണ ജോർജ് പറഞ്ഞു.