പത്തനംതിട്ട:പ്രായപൂർത്തിയാകാത്ത പെൺകുട്ടിയെ പീഡിപ്പിച്ച കേസിൽ പ്രതിക്ക് ജീവപര്യന്തം തടവും പിഴയും വിധിച്ച് കോടതി. പെരുമ്പെട്ടി കോട്ടാങ്ങൽ പാടിമൺ വട്ടകത്തറ രവീന്ദ്രൻ (65) നെയാണ് കോടതി ശിക്ഷിച്ചത്. ജീവപര്യന്തവും മൂന്ന് വർഷവും ഒരു മാസവും തടവും രണ്ട് ലക്ഷം രൂപ പിഴയുമാണ് കോടതി വിധിച്ചത്. പ്രായപൂർത്തിയാകാത്ത പെൺകുട്ടിയെ കൈകാലുകൾ ബന്ധിച്ച ശേഷം ബലം പ്രയോഗിച്ച് ലൈംഗിക പീഡനത്തിനിരയാക്കുകയായിരുന്നു. പത്തനംതിട്ട അതിവേഗ പോക്സോ സ്പെഷ്യൽ കോടതി ജഡ്‌ജി ഡോണി തോമസ് വർഗീസിൻ്റേതാണ് വിധി.
2018 സെപ്റ്റംബർ 30നാണ് കേസിനാസ്‌പദമായ സംഭവം. പെൺകുട്ടിയെ പ്രതി തൻ്റെ വീട്ടിലെ മുറിയിൽ കട്ടിലിൽ കൈകാലുകൾ കെട്ടിയിട്ട ശേഷം ലൈംഗികമായി ഉപദ്രവിക്കുകയായിരുന്നു. പുറത്തുപറഞ്ഞാൽ അമ്മയെയും അച്ഛനെയും കൊല്ലുമെന്ന് പ്രതി ഭീഷണിപ്പെടുത്തി. ബലാത്സംഗത്തിനിടെ കുതറിയോടാൻ ശ്രമിച്ച പെൺകുട്ടിയെ പ്രതി അടിച്ചു തള്ളിതാഴെയിടുകയും കുട്ടിയുടെ ബോധം നഷ്‌ടപ്പെടുകയും ചെയ്‌തു.