എറണാകുളം: ചോറ്റാനിക്കരയിൽ പോക്സോ കേസ് അതിജീവിതയായ 19-കാരിയെ ക്രൂരമായി മർദിച്ച കേസിൽ ആൺ സുഹൃത്ത് കസ്റ്റഡിയില്‍. തലയോലപ്പറമ്പ് സ്വദേശിയായ ഇരുപത്തി നാലുകാരനെതിരെ വധശ്രമത്തിനാണ് പൊലീസ് കേസെടുത്തത്. ഇയാളെ ചോദ്യം ചെയ്‌തു വരികയാണ്.
കഴിഞ്ഞ ഞായറാഴ്‌ചയാണ് ചോറ്റാനിക്കരയിലെ വീട്ടിൽ യുവതിയെ പരിക്കേറ്റ് അബോധാവസ്ഥയിൽ കണ്ടെത്തിയത്. സ്വകാര്യ ആശുപത്രിയിൽ ഗുരുതരാവസ്ഥയിൽ തുടരുന്ന യുവതി അപകട നില തരണം ചെയ്‌തിട്ടില്ല.
ശനിയാഴ്‌ച യുവാവ് പെൺകുട്ടിയുടെ വീട്ടിലെത്തി അതിക്രൂരമായി മർദിച്ചുവെന്നാണ് സംശയിക്കുന്നത്. യുവതി മരിച്ചെന്ന സംശയത്തിൽ ഇയാൾ സംഭവ സ്ഥലത്ത് നിന്നും രക്ഷപെടുകയായിരുന്നു.
ഇടിവി ഭാരത് കേരള വാട്‌സ്‌ആപ്പ് ചാനലില്‍ ജോയിന്‍ ചെയ്യാന്‍ ഈ ലിങ്കില്‍ ക്ലിക്ക് ചെയ്യുക
ഞായറാഴ്‌ച വൈകിട്ട് ബന്ധുവാണ് യുവതിയെ പരിക്കേറ്റ് അബോധാവസ്ഥയിൽ കണ്ടെത്തിയത്. സംഭവ സമയം വീട്ടിൽ അമ്മ ഇല്ലായിരുന്നു. യുവതിയുടെ വീട്ടിൽ ഫോറൻസിക്ക് സംഘമെത്തി ഇന്ന് പരിശോധന നടത്തും.
പെൺകുട്ടിയുടെ കഴുത്തിൽ കയർ കുരുക്കിയ നിലയിലായിരുന്നു കണ്ടെത്തിയത്. ഇത് പ്രതി ചെയ്‌തതാണോ യുവതി ആത്മഹത്യയ്ക്ക് ശ്രമിച്ചതാണോയെന്നും പൊലീസ് പരിശോധിച്ച് വരികയാണ്. ക്രിമിനൽ പശ്ചാത്തലമുള്ള വ്യക്തി കൂടിയാണ് യുവതിയുടെ ആൺ സുഹൃത്ത് എന്നാണ് പൊലീസ് നൽകുന്ന വിവരം.
ചോറ്റാനിക്കര സ്വദേശികളുടെ ദത്തുപുത്രിയായ പെൺകുട്ടി മൂന്ന് വർഷം മുമ്പാണ് ലൈംഗിക പീഡനത്തിനരയായത്. വളർത്തച്ഛൻ മരിച്ചതിനാല്‍ അമ്മയോടെപ്പമാണ് പെൺകുട്ടി കഴിഞ്ഞിരുന്നത്. ഇതിനിടെയാണ് തലയോലപ്പറമ്പ് സ്വദേശിയുമായി പ്രണയത്തിലായത് എന്നാണ് നാട്ടുകാർ നൽകുന്ന വിവരം.
Also Read:അടൂരില്‍ പതിനേഴുകാരിയെ പീഡിപ്പിച്ച കേസ്; നാല് യുവാക്കൾക്ക് പിന്നാലെ വയോധികനായ മന്ത്രവാദിയും അറസ്‌റ്റിൽ - OLD MAN ARRESTED IN POCSO
