കൊല്ലം: ജില്ലാ കോടതിയിലെ കേസുകൾ കൂട്ടത്തോടെ മാറ്റുന്നതിൽ പ്രതിഷേധിച്ച് കോടതി ബഹിഷ്‌കരണം തുടരാൻ ഉറച്ച് അഭിഭാഷകർ. ജില്ല ജഡ്‌ജിയുടെ നേതൃത്വത്തിൽ വിളിച്ചു ചേർത്ത സമവായ ചർച്ചയിലും പരിഹാരമാക്കാത്ത സാഹചര്യത്തിലാണ് അഭിഭാഷകരുടെ തീരുമാനം. കൊല്ലം ജില്ലാ കോടതിയുടെ അധികാരപരിധിയിൽ പെടുന്ന കേസുകൾ, ചവറ, കരുനാഗപ്പള്ളി, കൊട്ടാരക്കര കോടതികളിലേക്ക് മാറ്റുന്നതിനുള ഹൈക്കോടതിയുടെ വിജ്ഞാപനം വന്നിരുന്നു.
അതോടെയാണ് കോടതി ബഹിഷ്‌കരണവുമായി അഭിഭാഷകർ രംഗത്തെത്തിയത്. ഇതിന്‍റെ ഭാഗമായി 2000 അഭിഭാഷകർ പ്രാക്‌ടീസ് ചെയ്യുന്ന കൊല്ലത്തുനിന്നും 5000ത്തോളം കേസുകള്‍, 30 അഭിഭാഷകർ മാത്രം പ്രാക്‌ടീസ് ചെയ്യുന്ന ചവറ മജിസ്ട്രേറ്റ് കോടതിയിലേക്ക് മാറ്റിയിരുന്നു. ഇത് ജില്ല കോടതിയിലെ അഭിഭാഷകർക്കടക്കം ഉണ്ടാക്കുന്ന ബുദ്ധിമുട്ടുകൾ ചൂണ്ടിക്കാട്ടിയാണ് കൊല്ലം ബാർ കൗൺസിലിന്‍റെ നേതൃത്വത്തിൽ അഭിഭാഷകർ ബഹിഷ്‌കരണ സമരം ആഹ്വാനം ചെയ്‌തത്.