തിരുവനന്തപുരം : ഗതാഗത മന്ത്രി കെ ബി ഗണേഷ് കുമാറിന്റെ നിർദേശപ്രകാരം ഡ്രൈവിങ് ലൈസൻസ് കിട്ടാനുള്ള നിബന്ധനകൾ കൂടുതൽ കർശനമാക്കാൻ മോട്ടോർ വാഹന വകുപ്പ്. 9 അംഗ ഉദ്യോഗസ്ഥ കമ്മിറ്റിയെ പുതിയ പരീക്ഷാ രീതി തയ്യാറാക്കുന്നതിന് രൂപീകരിച്ചു. നിലവിലുള്ള എച്ച് എടുക്കലിനും റോഡ് ടെസ്റ്റിനും പുറമെ കുത്തനെയുള്ള കയറ്റത്തില് നിര്ത്തി എടുക്കുക, വലിയ വളവുകളിലൂടെ ഓടിക്കുക, റിവേഴ്സ് പാർക്കിങ് ചെയ്യുക എന്നിവയും ഡ്രൈവിങ് ടെസ്റ്റിനൊപ്പമുണ്ടാകും (New Measures for Driving Test).
റോഡ് സുരക്ഷ ഉൾപ്പെടുന്ന പുതിയ ചോദ്യാവലി പുതിയ കമ്മിറ്റി തയാറാക്കും. 36 ചോദ്യങ്ങൾ ലേണേഴ്സ് ടെസ്റ്റിന് ഉൾപ്പെടുത്തുമെന്ന് ഗതാഗത കമ്മീഷണർ അറിയിച്ചു. 60 ശതമാനം ഉത്തരങ്ങൾ ശരിയായാൽ ലേണേഴ്സ് നൽകാമെന്നാണ് കേന്ദ്ര ചട്ടം. ഇതുപ്രകാരം നിലവിൽ 20 ചോദ്യങ്ങളിൽ 12 എണ്ണം ശരിയാക്കണം എന്നാണ് വ്യവസ്ഥ. ടെസ്റ്റ് നടത്തുമ്പോൾ ഡ്രൈവിങ് സ്കൂളുകള് ക്യാമറകൾ സ്ഥാപിക്കണമെന്നും ആവശ്യപ്പെടുമ്പോൾ ഈ ദൃശ്യങ്ങൾ കൈമാറണമെന്നും മോട്ടോർ വാഹനവകുപ്പ് നിർദ്ദേശിച്ചു (Kerala Motor Vehicle Department).