കൊടും വരള്‍ച്ച; ഹൈറേഞ്ചിലെ ജാതി കൃഷിയേയും ബാധിക്കുന്നു, ജാതിക്കൃഷിയെ ഇത്രയധികം വരള്‍ച്ച ബാധിക്കുന്നത് ഇതാദ്യം
ഇടുക്കി: കൊടും വരള്‍ച്ച ഹൈറേഞ്ചിലെ ജാതി കൃഷിയേയും സാരമായി തന്നെ ബാധിച്ചിട്ടുണ്ട്. മൂപ്പെത്തും മുമ്പ് ജാതിക്കായ കരിഞ്ഞുണങ്ങി നശിക്കുകയാണ്. ആഴ്‌ചകള്‍ മാത്രം വളര്‍ച്ചയെത്തിയ ജാതിക്കായാണ് മൂപ്പെത്തും മുമ്പേ വാടിക്കരിഞ്ഞ് പൊഴിഞ്ഞു വീഴുന്നത്.
ജലസേചനം അത്ര ആവശ്യമില്ലാത്ത കൃഷിയാണ് ജാതി കൃഷി. എന്നാല്‍ വരള്‍ച്ച രൂക്ഷമായതോടെ ജലസേചനം അനിവാര്യമായിക്കഴിഞ്ഞു. ഏതാനും ആഴ്‌ചകള്‍ മാത്രം വളര്‍ച്ചയെത്തിയ ജാതിക്കായയുടെ തൊണ്ടില്‍ ഉണക്ക് ബാധിക്കുകയും, ഏതാനും ദിവസങ്ങള്‍ക്കുള്ളില്‍ ജലാംശം നഷ്‌ടപ്പെട്ട് കരിഞ്ഞുണങ്ങുകയും ചെയ്യും. പിന്നീട് തണ്ട് കൊഴിഞ്ഞ് നിലത്തുവീഴും. കായയ്ക്കുള്ളിലെ ജാതിപത്രിയും മൂപ്പെത്താതെ നശിക്കുകയാണ്. ആദ്യമായാണ് ജാതിക്കൃഷിയെ ഇത്രയധികം വരള്‍ച്ച ബാധിക്കുന്നത്.