നീതി തേടി സരുൺ സജി വീണ്ടും സമരത്തിൽ (ETV Bharat)
ഇടുക്കി:കിഴുകാനത്ത് വനപാലകർ കള്ളക്കേസിൽ കുടുക്കിയ സംഭവത്തിൽ ആദിവാസി യുവാവിനും കുടുംബത്തിനും ഇനിയും നീതി ലഭിച്ചിട്ടില്ല. കുറ്റക്കാരായ ഉദ്യോഗസ്ഥരെ പ്രോസിക്യൂട്ട് ചെയ്യാൻ സർക്കാരിന് അപേക്ഷ നൽകിയിട്ട് 6 മാസം കഴിഞ്ഞു. സംഭവം നടന്ന് ഒന്നര വർഷമായിട്ടും നീതി നിഷേധിക്കുന്നതിനെതിരെ ശക്തമായ പ്രക്ഷോഭത്തിനൊരുങ്ങുകയാണ് ഈ കുടുംബം.
സരുൺ സജി കാട്ടിറച്ചി കടത്തിയെന്നായിരുന്നു കേസ്. ഇതേ തുടർന്ന് സരുണിനെ ജയിലിടുക്കുകയും ചെയ്‌തു. എന്നാൽ പിന്നീട് നടത്തിയ അന്വേഷണത്തിൽ ഇത് കള്ളക്കേസാണെന്ന് തെളിഞ്ഞു. വനം വകുപ്പ് ഉദ്യോഗസ്ഥരെ സസ്പെൻഡ് ചെയ്തെങ്കിലും തുടർ നടപടികൾ എടുക്കാനോ നഷ്‌ടപരിഹാരം നൽകാനോ സർക്കാർ തയ്യാറായില്ല.