രക്ഷാദൗത്യത്തിന് കൂടുതല്‍ പേര്‍; തലസ്ഥാനത്ത് നിന്നും ഫയര്‍ ഫോഴ്‌സിന്‍റെ രണ്ടാമത്തെ സംഘം വയനാട്ടിലേക്ക് - Fire Force Second Team to wayanad

വയനാട്ടിലെ ദുരന്തമുഖത്തേക്ക് രക്ഷാപ്രവർത്തനത്തിനായി രണ്ടാമത്തെ ഫയർഫോഴ്‌സ് സംഘം പുറപ്പെട്ടു. തിരുവനന്തപുരത്ത് നിന്നും പ്രത്യേകം തയ്യാറാക്കിയ കെഎസ്‌ആർടിസി ബസിലാണ് സേനയുടെ യാത്ര.

തിരുവനന്തപുരം: വയനാട് ദുരന്തത്തില്‍ രക്ഷാപ്രവര്‍ത്തനത്തിനായി രണ്ടാമത്തെ ഫയര്‍ ഫോഴ്‌സ് സംഘം തിരുവനന്തപുരത്ത് നിന്നും പുറപ്പെട്ടു. കെഎസ്ആര്‍ടിസി ബസിലാണ് നാല് ഓഫിസര്‍മാര്‍ ഉള്‍പ്പെടെ 52 അംഗ ഫയര്‍ ഫോഴ്‌സ് സേന പുറപ്പെട്ടത്. ആമയിഴഞ്ചാന്‍ തോട്ടില്‍ ജോയിയെ തിരഞ്ഞ സ്‌കൂബ ഡൈവര്‍മാര്‍ ഉള്‍പ്പെട്ട സംഘം ആദ്യം തന്നെ തിരുവനന്തപുരം ഹൗസിങ് ബോര്‍ഡ് ജങ്ഷന് സമീപത്തെ ഫയര്‍ ഫോഴ്‌സ് ആസ്ഥാനത്ത് നിന്നും പുറപ്പെട്ടിരുന്നു.

നിലവില്‍ രക്ഷാപ്രവര്‍ത്തനം ഉരുള്‍പൊട്ടല്‍ ബാധിച്ച കൂടുതല്‍ മേഖലകളിലേക്ക് എത്തിക്കാന്‍ സൈന്യം ബെയ്‌ലി പാലം നിര്‍മ്മിക്കുകയാണ്. ഇത് പൂര്‍ത്തിയാകുന്നതോടെ ഫയര്‍ഫോഴ്‌സിന്‍റെ സേവനം കൂടുതല്‍ ആവശ്യമായി വരുമെന്ന് കണ്ടാണ് രണ്ടാമത്തെ സംഘവും വയനാട്ടിലേക്ക് പുറപ്പെട്ടത്.