കോട്ടയം :ജോസ് കെ മാണി സിപിഎം അരക്കില്ലത്തിൽ കിടന്ന് വെന്തുരുകരുതെന്ന് വീക്ഷണം പത്രത്തിന്‍റെ മുഖ പ്രസംഗം. കോട്ടയം ലോക്‌സഭ സീറ്റിൽ ചാഴിക്കാടന്‍റെ തോൽവി ഉറപ്പായിരിക്കെ മാണി ഗ്രൂപ്പിന് ലോക്‌സഭയിലും രാജ്യസഭയിലും അംഗത്വമില്ലാതെയാവും. ദേശീയ പാർട്ടി പദവിയും ചിഹ്നവും നിലനിർത്താനുള്ള പോരാട്ടത്തിൽ ഇരു കമ്യൂണിസ്‌റ്റ് പാർട്ടികൾക്കും ജോസ് കെ മാണിയുടെ മോഹങ്ങൾ നിറവേറ്റിക്കൊടുക്കാൻ സാധ്യമല്ലെന്നും മുഖപ്രസംഗത്തില്‍ പറയുന്നു.
കോൺഗ്രസിനെപ്പോലെ ഘടക കക്ഷികള കരുതാൻ സിപിഎം തയാറാകില്ലെന്ന മുന്നറിയിപ്പും മുഖപത്രം നല്‍കുന്നു. ഘടക കക്ഷിയുടെ ആവശ്യങ്ങൾ നിരാകരിക്കുകയോ അവരെ അവഗണിക്കുകയോ ചെയ്യുന്ന രീതി കോൺഗ്രസിനില്ല. കഴിഞ്ഞ ലോക്‌സഭ തെരഞ്ഞെടുപ്പിൽ മൂന്നാം സീറ്റ് ആവശ്യപ്പെട്ട മുസ്ലിം ലീഗിന് രാജ്യസഭ സീറ്റ് നൽകിയത് മുന്നണി മര്യാദയുടെ പേരിലാണെന്നും മുഖപത്രത്തില്‍ വ്യക്തമാക്കുന്നു.