ന്യൂഡൽഹി:കാത്തിരുപ്പുകള്‍ക്ക് വിരാമമിട്ട് ഡൽഹിയിലെത്തിയ ഇന്ത്യൻ ക്രിക്കറ്റ് ടീമിന് ആവേശകരമായ സ്വീകരണമൊരുക്കി ആരാധകര്‍. ഇന്ന് രാവിലെയോടെയാണ് താരങ്ങള്‍ ഡല്‍ഹിയിലെത്തിയത്. ബാർബഡോസിൽ നിന്നുളള പ്രത്യേക വിമാനത്തിലായിരുന്നു രോഹിത് ശർമയുടെയും സംഘത്തിന്‍റെയും നാട്ടിലേക്കുള്ള യാത്ര.
ഡല്‍ഹി വിമാനത്താവളത്തില്‍ നിന്നും സ്വകാര്യ ഹോട്ടലിലേക്ക് പോകുന്ന ടീം ശേഷം പ്രധാനമന്ത്രി നരേന്ദ്ര മോദിയുമായി കൂടിക്കാഴ്‌ച നടത്തും. തുടര്‍ന്ന്, വിക്‌ടറി പരേഡിനായി രാവിലെ 9.30ന് മുബൈയിലേക്ക് പുറപ്പെടും. വാങ്കഡെ, നരിമാൻ പോയിന്‍റ് തുടങ്ങിയ ഇടങ്ങളിലാണ് വിക്‌ടറി പരേഡ്.
ഡല്‍ഹി അന്താരാഷ്‌ട്ര വിമാനത്താവളത്തിലെത്തിയ ഇന്ത്യൻ ക്രിക്കറ്റ് ടീമിനെ സ്വീകരിക്കാൻ നിരവധി ആരാധകരും തടിച്ചുകൂടിയിരുന്നു. വിമാനത്താവളത്തിന് പുറത്ത് ടീമിനായി മണിക്കൂറുകളോളം അക്ഷമരായി തന്നെ ആരാധകര്‍ കാത്തുനിന്നു. വിമാനത്താവളത്തിന് പുറത്തേക്ക് എത്തിയ ടീമിനെ ഹര്‍ഷാരവങ്ങളോടെയും ആര്‍പ്പുവിളികളോടെയുമാണ് ആരാധകര്‍ സ്വീകരിച്ചത്.