പാരിസ്: ഈ വര്‍ഷത്തെ ബാലൺ ഡി ഓർ പുരസ്‌കാരം നാളെ (ഒക്‌ടോബര്‍ 29) അര്‍ധരാത്രി 12.30ന് പ്രഖ്യാപിക്കാനിരിക്കെ ഫുട്ബോള് ചരിത്രത്തില്‍ പുതുയുഗം പിറക്കുന്നു. അര്‍ജന്‍റൈൻ സൂപ്പര്‍താരം ലയണല്‍ മെസിയും പോര്‍ച്ചുഗീസ് ഇതിഹാസം ക്രിസ്‌റ്റ്യാനോ റൊണാള്‍ഡോയും ഇല്ലാത്ത ഒരു ബാലണ്‍ ഡി ഓര്‍ പുരസ്‌കാര ദാന ചടങ്ങിനാണ് നാളെ പാരിസ് സാക്ഷ്യം വഹിക്കുക. 21 വര്‍ഷത്തിന് ശേഷം ഇതാദ്യമായാണ് ഇരുതാരങ്ങളുമില്ലാത്ത ബാലണ്‍ ഡി ഓര്‍ പുരസ്‌കാര പ്രഖ്യാപനം എത്തുന്നത്.
2003 മുതല്‍ എല്ലാ വര്‍ഷത്തെയും ബാലണ്‍ ഡി ഓര്‍ സാധ്യതാ പട്ടികയില്‍ സൂപ്പർ താരങ്ങളായ ലയണൽ മെസിയും ക്രിസ്‌റ്റ്യാനോ റൊണാൾഡോയും ഇടംപിടിച്ചിരുന്നു. ഫുട്ബോള് മൈതാനം അടക്കി വാഴുന്ന ഫുട്ബോള് മിശിഹ എന്നറിയപ്പെടുന്ന മെസിക്ക് എട്ട് തവണ ബാലൺ ഡി ഓർ പുരസ്‌കാരം ലഭിച്ചിട്ടുണ്ട്. 2009, 2010, 2011, 2012, 2015, 2019, 2021, 2023 വർഷങ്ങളിലാണ് മെസി പുരസ്‌കാരത്തിന് അർഹനായത്. അർജന്‍റീന ലോകകപ്പ് സ്വന്തമാക്കിയതിന് തൊട്ടുപിന്നാലെ കഴിഞ്ഞവർഷവും ബാലൻ ഡി ഓർ പുരസ്‌കാരം മെസി നേടിയിരുന്നു. പോര്‍ച്ചുഗീസ് നായകന്‍ റൊണാള്‍ഡോയ്ക്ക് ആറ് തവണയും പുരസ്‌കാരം ലഭിച്ചിട്ടുണ്ട്.
ഇടിവി ഭാരത് കേരള വാട്‌സ്‌ആപ്പ് ചാനലില്‍ ജോയിന്‍ ചെയ്യാം
2023 ഓഗസ്‌റ്റ് ഒന്ന് മുതൽ 2024 ജൂലൈ 31 വരെയുള്ള സീസണിലെ പ്രകടനങ്ങളെ അടിസ്ഥാനമാക്കിയാണ് 2024 ബാലണ്‍ ഡി ഓര്‍ പുരസ്‌കാരം പ്രഖ്യാപിക്കുക. ഇത്തവണ 30 പേരാണ് പട്ടികയില്‍ ഇടംപിടിച്ചത്. റയൽ മാഡ്രിഡ് താരങ്ങളായ കിലിയൻ എംബാപ്പേ, വിനീഷ്യസ് ജൂനിയർ, ജൂഡ് ബെല്ലിങ്ഹാം, മാഞ്ചസ്‌റ്റര്‍ സിറ്റി താരം ഏർലിങ് ഹാലൻഡ്, റോഡ്രി, ബാഴ്‌സലോണയുടെ സ്‌പാനിഷ് യുവ താരം ലാമിൻ യമാൽ, ഇംഗ്ലണ്ടിന്‍റെ ഹാരി കെയ്ൻ, അർജന്‍റീനയുടെ ലൗതാരോ മാർട്ടിനെസ്, എമി മാർട്ടിനെസ് എന്നിവർ പട്ടികയിലുണ്ട്. മികച്ച ഗോൾ കീപ്പർക്കുള്ള പുരസ്‌കാരത്തിന് അർജന്‍റീനയുടെ എമിലിയാനോ മാർട്ടിനസ്, റയൽ മാഡ്രിഡിന്‍റെ ആന്ദ്രേ ലുനിൻ, പിഎസ് ജി യുടെ ഇറ്റാലിയൻ ഗോൾ കീപ്പർ ഡോണരുമ, ഡിഗോ കോസ്‌റ്റ എന്നിവർ സാധ്യത പട്ടികയിലുണ്ട്.