പാരീസ്: 2024 പാരാലിമ്പിക്‌സിൽ ചരിത്രത്തിലെ മികച്ച സ്വര്‍ണ മെഡല്‍ വേട്ടയുമായി ഇന്ത്യ. അഞ്ച് സ്വര്‍ണ മെഡലുകളാണ് ഇന്ത്യ ഇതുവരെ സ്വന്തമാക്കിയത്. പാരീസ് ഗെയിംസിന്‍റെ ഏഴാം ദിവസം ഇന്ത്യൻ സംഘം രണ്ട് സ്വർണവും രണ്ട് വെള്ളിയും നേടി. പാരാലിമ്പിക്‌സിൽ സ്വർണം നേടുന്ന ആദ്യ ഇന്ത്യൻ അമ്പെയ്ത്ത് താരമായി ഹർവീന്ദർ സിങ് മാറി.
ക്ലബ്ബ് ത്രോ താരം ധരംബീറും റെക്കോർഡ് ഫിനിഷിങ് ആണ് നടത്തിയിരുന്നത്. ലോക ചാമ്പ്യനായ ഷോട്ട്പുട്ട് താരം സച്ചിൻ സർജെറാവു ഖിലാരിയും മറ്റൊരു ക്ലബ് ത്രോ താരം പ്രണവ് സൂർമയും അവരുടെ ഇനങ്ങളില്‍ അസാമാന്യ പ്രകടനമാണ് കാഴ്‌ചവെച്ചത്. ഇരുവരും വെള്ളി മെഡലും കരസ്ഥമാക്കി. ഇവരുടെ അസാധാരണ പ്രകടനങ്ങളിലൂടെ ഇന്ത്യയുടെ മെഡൽ നേട്ടം 24 ആയി ഉയർന്നു.