ആരാധകരെ ശാന്തരാകുവിന്‍.... കാല്‍പന്തുകളിയുടെ പറുദീസയില്‍ പന്തുതട്ടാന്‍ അര്‍ജന്‍റീന ഫുട്ബോള് ടീം എത്തുന്നു. ലോകചാമ്പ്യന്മാര്‍ അടുത്ത വര്‍ഷം കേരളത്തിലെത്തുമെന്നാണ് പുറത്തുവരുന്ന റിപ്പോര്‍ട്ട്. കായിക മന്ത്രി വി അബ്‌ദുറഹിമാൻ നാളെ (നവംബര്‍ 19) നടത്താനിരിക്കുന്ന വാർത്ത സമ്മേളനത്തിൽ ഇതുമായി ബന്ധപ്പെട്ട ഔദ്യോഗിക പ്രഖ്യാപനം ഉണ്ടാകും.
ലയണൽ മെസി കേരളത്തിലെത്തുമോ എന്ന കാര്യത്തില്‍ വ്യക്തതയില്ല. ഇതു സംബന്ധിച്ച് അര്‍ജന്‍റീന ഫുട്ബോള് അസോസിയേഷനാവും അന്തിമ തീരുമാനം എടുക്കുക. കായിക മന്ത്രിയുടെ വാര്‍ത്ത സമ്മേളനത്തില്‍ ലയണൽ മെസി കേരളത്തിലെത്തുമോ എന്ന കാര്യത്തിലും സ്ഥിരീകരണം ഉണ്ടാകുമെന്നാണ് പ്രതീക്ഷിക്കുന്നത്.
ഇടിവി ഭാരത് കേരള വാട്‌സ്‌ആപ്പ് ചാനലില്‍ ജോയിന്‍ ചെയ്യാന്‍ ഈ ലിങ്കില്‍ ക്ലിക്ക് ചെയ്യുക
കൊച്ചിയിലും തിരുവനന്തപുരത്തുമായി രണ്ട് മത്സരങ്ങള്‍ നടക്കുമെന്നാണ് സൂചന. എന്നാല്‍ ലോകചാമ്പ്യന്മാരായ അർജൻ്റീന ഫുട്ബോൾ ടീം ആരുമായാണ് മത്സരിക്കുക എന്ന കാര്യത്തില്‍ വ്യക്തതയില്ല. ഏഷ്യയിലെ ഏതെങ്കിലും പ്രമുഖ ടീം തന്നെ അര്‍ജന്‍റീനയെ നേരിടാന്‍ കളത്തിലിറങ്ങാനാണ് സാധ്യത. ഫിഫ റാങ്കിങ്ങില്‍ ഏറ്റവും മുന്‍നിരയില്‍ നില്‍ക്കുന്ന ജപ്പാനാണ് അര്‍ജന്‍റീനക്കെതിരെ കളത്തിലിറങ്ങാന്‍ കൂടുതല്‍ സാധ്യത. ഇറാന്‍, ദക്ഷിണ കൊറിയ, ഓസ്‌ട്രേലിയ, ഖത്തര്‍ എന്നീ രാജ്യങ്ങളാണ് റാങ്കിങ്ങില്‍ മുന്നിലുളള മറ്റ് ഏഷ്യയിലെ പ്രമുഖ ടീമുകള്‍.