'ദി ഗോട്ട്' സിനിമയുടെ വിജയത്തില്‍ സന്തോഷം പങ്കുവച്ച് വിജയ്ക്ക് ഗോട്ട് എന്നെഴുതിയ സ്വര്‍ണ മോതിരം സമ്മാനിച്ച് ടി. ശിവ. അമ്മ ക്രിയേഷന്‍സ് നിര്‍മാണ കമ്പനിയുടെ ഉടമ കൂടിയായ ശിവ ഗോട്ട് സിനിമയില്‍ വിജയ്‌ക്കൊപ്പം അഭിനയിച്ചിട്ടുമുണ്ട്. ഗോട്ട് മോതിരം അണിഞ്ഞുകൊണ്ടുള്ള ചിത്രം വിജയ് തന്‍റെ സോഷ്യല്‍ മീഡിയയിലൂടെ പങ്കുവച്ചിട്ടുണ്ട്. ചിത്രം പങ്കുവച്ച് നിമിഷങ്ങള്‍ക്കുള്ളില്‍ വൈറലാവുകയും ചെയ്‌തു.
അഞ്ച് മണിക്കൂറില്‍ രണ്ട് മില്ല്യണ്‍ ലൈക്കുകളാണ് ഈ ഫോട്ടോയ്ക്ക് ലഭിച്ചിരിക്കുന്നത്. അറുപതിനായിരത്തോളം കമന്‍റുകളും ഇതിനോടകം ലഭിച്ചു. അക്കൗണ്ട് തുടങ്ങി അതിവേഗത്തിലാണ് താരം 10 മില്ല്യണ്‍ ഫോളോവേര്‍സിനെ ഉണ്ടാക്കിയത്.
ഇപ്പോള്‍ ഇന്‍സ്‌റ്റഗ്രാമില്‍ മാത്രം 12 മില്ല്യണ്‍ ആണ് വിജയ്യുടെ ഫോളോവേര്‍സ്. കഴിഞ്ഞ വര്‍ഷം ഏപ്രിലിലാണ് വിജയ് ഇന്‍സ്‌റ്റഗ്രാം തുടങ്ങുന്നത്. ലിയോ എന്ന സിനിമയുടെ ചിത്രീകരണത്തിനിടയ്ക്കായിരുന്നു അത്.
അതേസമയം 380 കോടി ബഡ്‌ജറ്റിലാണ് ദി ഗോട്ട് നിര്‍മിച്ചത്. നിര്‍മിച്ച ഈ ചിത്രം 459 കോടി രൂപയാണ് ആഗോള തലത്തില്‍ നേടിയത്. ഇപ്പോള്‍ ഒടിടിയിലും ചിത്രം പ്രദര്‍ശനത്തിന് എത്തിയിട്ടുണ്ട്.
തിയേറ്ററില്‍ ഒരു മാസം തികയ്‌ക്കും മുന്‍പാണ് ചിത്രം ഒടിടിയിലേക്ക് എത്തുന്നത്. തമിഴ്, തെലുങ്ക്, മലയാളം, ഹിന്ദി എന്നീ ഭാഷകളിലാണ് ചിത്രം എത്തിയത്. വെങ്കിട്ട് പ്രഭു സംവിധാനം ചെയ്‌ത ഈ ചിത്രത്തില്‍ വിജയ് ഇരട്ട വേഷത്തിലാണ് എത്തുന്നത്. സെപ്റ്റംബര്‍ അഞ്ചിനാണ് ചിത്രം തിയേറ്ററുകളില്‍ എത്തിയത്.