സേതുനാഥ് പ്രഭാകറിന്‍റെ നോവൽ 'പേര് ശ്രീരാമൻ' പ്രകാശനം ചെയ്‌തു - Peru Sreeraman Novel Launch

എഴുത്തുകാരനും ചിത്രകാരനുമായ സേതുനാഥ് പ്രഭാകറിന്‍റെ രണ്ടാമത്തെ നോവലിന്‍റെ പ്രകാശനം നടന്നു. ടി ഡി രാമകൃഷ്‌ണനിൽ നിന്നും പുസ്‌തകം ഏറ്റുവാങ്ങി ജിയോ ബേബി

മലയാളത്തിലെ യുവ എഴുത്തുകാരൻ സേതുനാഥ് പ്രഭാകറിന്‍റെ 'പേര് ശ്രീരാമൻ' എന്ന പുതിയ നോവലിന്‍റെ പ്രകാശനം നടന്നു. എഴുത്തുകാരനായ ടി ഡി രാമകൃഷ്‌ണൻ, സിനിമ സംവിധായകൻ ജിയോ ബേബി എന്നിവരാണ് പ്രകാശന കർമം നിർവഹിച്ചത്. കവി ശ്രീജിത്ത് അരിയല്ലൂർ ആമുഖ പ്രഭാഷണം നടത്തി. ടി ഡി രാമകൃഷ്‌ണനിൽ നിന്നും ജിയോ ബേബി പുസ്‌തകം ഏറ്റുവാങ്ങി.

എഴുത്തുകാരനും ചിത്രകാരനുമായ സേതുനാഥ് പ്രഭാകറിന്‍റെ രണ്ടാമത്തെ നോവലാണ് 'പേര് ശ്രീരാമൻ'. 'ഭ്രൂണം' ആയിരുന്നു ഇദ്ദേഹത്തിന്‍റെ ആദ്യ നോവൽ. 2001-ൽ ആണ് 'ഭ്രൂണം' പ്രസിദ്ധീകരിച്ചത്.

കോതമംഗലം സ്വദേശിയാണ് സേതുനാഥ് പ്രഭാകർ. ബറോഡയിൽ ചിത്രകല പഠനം പൂർത്തിയാക്കിയ ഇദ്ദേഹം ഗുജറാത്തിൽ ദ്വാരകയ്‌ക്ക് അടുത്തുള്ള ജൈന ക്ഷേത്രത്തിൽ ചിത്രങ്ങൾ വരച്ചിട്ടുണ്ട്. കൂടാതെ ആരാധന ദാമിലെ ആർട്ട് ഗ്യാലറിയിലുള്ള മുഴുവൻ ചിത്രങ്ങളും ഇദ്ദേഹത്തിന്‍റേതാണ്. മാതൃഭൂമി, കലാകൗമുദി, കുങ്കുമം, സമകാലിക മലയാളം തുടങ്ങിയ വാരികകളിൽ ഇദ്ദേഹത്തിന്‍റെ കഥകൾ പ്രസിദ്ധീകരിച്ചിട്ടുണ്ട്.

2009ൽ ഓസ്‌ട്രേലിയയിലേക്ക് കുടിയേറിയ സേതുനാഥ് പ്രഭാകർ മെൽബണിലെ പ്രധാന ഗ്രൂപ്പ് എക്‌സിബിഷനിൽ പങ്കെടുത്ത് വരികയാണ്. ഓസ്‌ട്രേലിയൻ ചരിത്രത്തിൽ ആദ്യമായി 'പ്രൈഡ് ഓഫ് ഓസ്‌ട്രേലിയ' എന്ന ഇദ്ദേഹത്തിന്‍റെ പോർട്രൈറ്റ് സീരീസ് വിക്ടോറിയൻ പാർലമെന്‍റിൽ പ്രദർശിപ്പിക്കപ്പെട്ടു. അതേ വർഷം തന്നെ ഒമാന്‍റെ 47-ാമത് നാഷണൽ ഡേയിൽ മസ്‌കറ്റിൽ ഫൈൻ ആർട്‌സ് ഓഫ് ഒമാൻ ചിത്രപ്രദർശനം നടത്തി.

ഇന്ത്യൻ മിത്തോളജിയെയും ഗാന്ധിജിയെയും അവലംബിച്ചു കൊണ്ടുള്ള കണ്ടംപററി സീരീസ് ആണ് പുതിയ പെയിന്‍റിങ്ങുകൾ. ഇപ്പോഴിതാ ഒരു ഇടവേളക്കുശേഷം വീണ്ടും എഴുത്തിൽ സജീവമായിരിക്കുകയാണ് സേതുനാഥ് പ്രഭാകർ.

സമരസപ്പെടാത്ത വിപ്ലവകാരിയുടെ സർഗ്ഗജീവിതവും നീതി ബോധവും ശ്രീരാമൻ എന്ന കഥാപാത്രത്തിലൂടെ നോവലിൽ ഉടനീളം ദൃശ്യമാക്കുകയാണ് സേതുനാഥ്. 'ആത്മ'കഥയെന്നോ അന്വേഷണമെന്നോ വേർതിരിക്കാനാവാത്ത ഭാഷയുടെ സൗന്ദര്യം ഈ നോവലിൽ വായനക്കാർക്ക് ആസ്വദിക്കാനാവും. നിലനിൽക്കുന്ന സദാചാര, ആചാര ക്രമങ്ങളിലൊന്നും ഒതുങ്ങി ജീവിക്കാത്ത ശ്രീരാമൻ മത നിരപേക്ഷ മാനവികതയുടെ വക്താവായി വളരുന്നുണ്ട്.

പക്ഷെ, ഭരണകൂടവും മേൽക്കോയ്‌മ ബോധവും ചേർന്ന് പോരാട്ടങ്ങളെയും പ്രതിരോധങ്ങളെയും എങ്ങനെ വക വരുത്തുന്നു എന്നും ഈ നോവൽ കൃത്യമായി പറയുന്നു. നോവലിലെ ഭൂപ്രകൃതികളും കാലവും കഥാപാത്രങ്ങളും പല മട്ടിൽ ഓരോ രാഷ്‌ട്രീയത്തെയും കാപട്യങ്ങളെയും തുറന്നു കാണിക്കുന്നുമുണ്ട്.

നേരിന്‍റെ വഴി തേടുന്നവർ എക്കാലവും എത്തിപ്പെടുന്നത് ഭ്രാന്തിന്‍റെ മുനമ്പുകളിലാണ് എന്ന് ഈ നോവൽ അടയാളപ്പെടുത്തുന്നു. സർഗാത്മകത ഉള്ളിൽ പേറുന്നവർക്ക് സ്വാതന്ത്ര്യവും ആസക്തികളും ബന്ധങ്ങളും ബന്ധനങ്ങളും പെട്ടന്ന് തിരിച്ചറിയാനാവും. ഹിന്ദുത്വയുടെയും ഗുജറാത്ത് കലാപത്തിന്‍റെയും ആസൂത്രിതമായ കരുനീക്കങ്ങൾ കൂടി നോവൽ വെളിപ്പെടുത്തുന്നു.

നോവലുകൾ വിറ്റ കണക്കിന്‍റെ പേരിൽ വാഴ്‌ത്തപ്പെടുകയും വിൽക്കുവാനുള്ള തന്ത്രങ്ങൾ പലമട്ടിൽ മെനയപ്പെടുകയും ചെയ്യുന്ന കാലത്ത് രാഷ്‌ട്രീയ ജാഗ്രതയുള്ള വായനക്കാരിൽ നിശബ്‌ദമായ ഒരാഘാതം 'പേര് ശ്രീരാമൻ' നോവൽ സൃഷ്‌ടിക്കുന്നുണ്ടെന്നാണ് നിരൂപകരുടെ വിലയിരുത്തല്‍. പിആർഒ - എംകെ ഷെജിൻ.