ഉണ്ണി മുകുന്ദനെ നായകനാക്കി ഹനീഫ് അദേനി തിരക്കഥ രചിച്ച് സംവിധാനം ചെയ്യുന്ന "മാർക്കോ" എന്ന ചിത്രത്തിൻ്റെ മൂന്നാർ ഷെഡ്യൂൾ പൂർത്തിയായി. പതിനഞ്ച് ദിവസത്തോളം നീണ്ടുനിന്നതായിരുന്നു മൂന്നാറിലെ ചിത്രീകരണം. ചിത്രത്തിലെ നിർണ്ണായക ത്രില്ലർ രംഗങ്ങളാണ് മൂന്നാറില്‍ ചിത്രീകരിച്ചത്.
ഇനി ഒന്നരമാസത്തോളം സിനിമയുടെ ചിത്രീകരണം കൊച്ചിയിലും പരിസരപ്രദേശത്തും നടക്കും. കൊച്ചിയിലെ ഷെഡ്യൂൾ പൂർത്തിയാക്കിയാൽ ഉടൻ വിദേശ രംഗങ്ങൾ ചിത്രീകരിക്കുവാനായി പുറപ്പെടും. ഗ്രീസാണ് വിദേശ ചിത്രീകരണത്തിലുളള പ്രധാന ലൊക്കേഷൻ.
ഉണ്ണി മുകുന്ദനോടൊപ്പം സിദ്ദിഖ്, ജഗദീഷ്, ആൻസൺ പോൾ, കബീർ ദുഹാൻസിങ്, യുക്തിതരേജ, ദിനേശ് പ്രഭാകർ, മാത്യു വർഗീസ്, അജിത് കോശി തുടങ്ങി നിരവധി പ്രമുഖ താരങ്ങളും സിനിമയില്‍ അണിനിരക്കുന്നുണ്ട്. പ്രശസ്‌ത നടൻ ഷമ്മി തിലകൻ്റെ മകൻ അഭിമന്യു തിലകൻ, ഇഷാൻ ഷൗക്കത്ത് എന്നി പുതുമുഖങ്ങളെയും ചിത്രത്തിലൂടെ അവതരിപ്പിക്കുന്നുണ്ട്.